БҚО да колледждер сенімгерлік басқаруға беріледі

Батыс Қазақстан облысында биыл 8 арнаулы орта оқу орнын сенімгерлік басқаруға беру туралы шешім шыққан.

Осылайша, кәсіптік колледждердің материалдық-техникалық базасын жақсартып, білім сапасын арттырамыз, - дейді жауаптылар. 

Қаладағы педогогикалық колледждің іргетасы 1913 жылы қаланды.  Ғасырдан астам тарихы бар оқу орнында талай танымал тұлға тәлім алды. Бүгінде мыңнан астам шәкірт оқып жүр. Педагогикалық оқу орындарының элитасына енген колледж биыл жекешеленеді. Алайда басшылықтың өзі бұл өзгерістің қашан және қалай жүзеге асатынын толық білмейді.

Салтанат Кенжеғалиева, колледж директорының орынбасары:

- 2025 жылдың соңында әлеуметтік желіден 8 колледж тізімін. Сол бойынша ғана мәлімет білеміз. Ал нақты қай уақытта шешіледі, қай уақытта беріледі, ол туралы ештеңе айта алмаймын.

Облыстық білім басқармасы басшысы  биыл облыста 8 колледж сенімді басқаруға берілетінін айтады. Нысандар тізімі былтыр  24 қазанында Ұлттық жекешелендіру кеңсесінің отырысында бекітіліпті. Мақсат – бәсекелес ортаға беру арқылы оқу орындарының материалдық-техникалық базасын жақсарту, қазына қаржысын үнемдеу.

Елдос Сафуллин, облыстық Білім басқармасының басшысы:

- Бұл жерде материалдық-техникалық базасын жаңартады, жақсартады және түпкілікті жекешелендіруге берілмейді. Тек қана мемлекет қарамағында қалады. Осы сенімгерлікке берудің 3 жылға, 5 жылға, 10 жылға беретін мүмкіндіктері бар. Соның ішінде біздер 5 жыл деген мерзімді таңдап отырмыз.

Дегенмен ұжымда сенімгерлік басқаруға күмәнмен қарайтындар бар. Кәсіпкер алдымен өз пайдасын көздейді деген ойда. Болашақта жатақханамен қамту және жалақы мәселесі туындай ма деп қорқады.

Біржан Сапиев, педагогикалық колледж мұғалімі:

- Мемлекеттік  қаржыландыру бөлек қой. Бұлардың қаржыландыруы қалай болады, оған мүмкіндігі жете ме, жоқ па, біздің кадрлар құрамына категорияға сай мүмкіндіктері, соған сай ұстаздарға қаржы төлей ала ма? Ертең ұстаздардың басқа жұмысқа кетуі, ығысу процестері бола ма, жоқ па? Осының бәрі ойландырмай ма? Ойландырады. Сосын білім сапасына тікелей әсер етеді.

Ақбота Нұғманова, қала тұрғыны:

- Осы колледжде 1200 студент білім алып жатыр. Көп балалы отбасыдан шыққан студенттер бар, толық емес отбасылар бар, аз қамтылған отбасыдан шыққандар бар, жетім студенттер бар, соның барлығына 10%-дан  25%-ға  дейін жеңілдіктер беріліп жатыр. Ал жекеге берілгенде ондайлар қарастырыла ма?

Оқу орындарының ұжымы мен ата-аналар тарапынан туындаған сауалдарға әзірге жауап жоқ. Өйткені алдағы өзгеріс туралы колледждерде әлі  тыңдау өткізілмеген, талқылау болмаған. Облыстық мәслихаттың тұрақты комиссиясы да әлі қарамады. Тек 8 колледж емес, жекешелендіретін нысандар тізіміне өңірден 33 нысан енген. Олардың қатарында қаланы сумен, жылумен, жарықпен қамтитын кәсіпорындар да бар.

Ербол Салықов, облыстық Мәслихатының бюджет және өңірлік даму жөніндегі тұрақты комиссиясының төрағасы:

- Кезінде бірінші училище берілді, қазір ол колледж ғой. Оны да сенімгерлік басқаруға алған адам сатқан жоқ. Ешқандай қаржы, инвестиция салып, оның бір жұмысын, сапасын көтеретіндей болмады. Ақыр соңында соттасу арқылы бұл процесс аяғына жеткен жоқ. Сондықтан әрине, осындай күдік туады. Жергілікті жердегі өкілетті қоғамдық ұйымдардың, жалпы мемлекеттік органдардың пікірі ескерілсе, дұрыс болар еді деп есептейміз және айтып та жүрміз.

Ал облыстық білім басқармасы арнаулы орта оқу орындарын сенімді басқаруға алған кәсіпкерге тиісті талаптар қойылатынын, келісім-шартта мемлекет мүддесі, ұстаздар мен шәкірт жағдайы мейлінше ескерілетінін айтады.

Авторлары: Е. Жылқайдарұлы, Б. Жарылғасов, Э. Аюпов