БҚО мен Корея бірнеше салада ынтымақтастық орнатты

Өнеркәсіп, қайта өңдеу, ауыл шаруашылығы, денсаулық сақтау және экология. Осы салалардағы ынтымақтастық жайлы келісімге Батыс Қазақстан облысының әкімі Нариман Төреғалиевтің Оңтүстік Кореяға жұмыс сапары барысында қол жеткізілді. Делегация құрамында дәрігерлер мен кәсіпкерлер бар.

Орал қаласының ауруханаларынан келген 10 дәрігер Әулие Мария клиникасында тағылымдамадан өтеді. Мұндай мүмкіндік Батыс Қазақстан облысының басшысы мен оңтүстіккореялық клиника президенті қол қойған ынтымақтастық туралы меморандумның арқасында пайда болды. Сонымен бірге енді Орал мен Инчхон дәрігерлері айына бір рет бейнебайланыс арқылы кеңес өткізе алады.

Нариман Төреғалиев, Батыс Қазақстан облысының әкімі:

- Біздің әрбір салаға қатысты солардан көріп үйренуіміз керек және олармен осындай тәжірибе алмаса отырып, өзіміздің мамандарды сондай деңгейге жеткізу, сонымен қатар, әрине, инвестиция тарту арқылы облысымызда жаңа жұмыс орындарын, жаңа кәсіпорындарды, әсіресе өңдеу кәсіпке байланысты кәсіпорындарды ашу – біздің басты мақсатымыз.

Ко Донг Хён, Инчхон қаласындағы Әулие Мария клиникасының президенті:

- Неврология және нейрохирургия бөлімдерінің дәрігерлері біздің ауруханада қысқамерзімді тағылымдамадан өтіп жатыр. Қысқа мерзімге келетін мамандардан бөлек, болашақта дәрігерлер бірнеше айға немесе бір жылға дейін келіп, біздің клиникада тағылымдамадан өтіп, озық медициналық технологияларымызды үйрене алады.

Сеулдегі Қазақстан елшілігі Нариман Төреғалиевпен кездесуге Оңтүстік Кореяның ірі компания басшыларын шақырды. Әкім инвесторлармен ауыл шаруашылығы, денсаулық сақтау, экология және өнімді қайта өңдеу салаларындағы жобаларды талқылады. Орал қаласында қатты тұрмыстық қалдықтарды қайта өңдеу зауытын салу туралы меморандумға қол қойылды.

Нұржан Өтепбаев, БҚО Кәсіпкерлік және индустриялық-инновациялық даму басқармасының басшысы:

- Бұл зауыт қоқысты жағып, электр энергиясын сатады. Қалдықтарынан сонда күн панельдері өндіріледі. Бүгінгі таңда зауыт жобалау кезеңінде, жер учаскесі бөлінген. Зауыт құрылыс кезеңіне өткен кезде 200-ден астам жұмыс орны ашылады және, тұтастай алғанда, ол жоғары технологиялық, яғни толық роботтандыру болады.

Батыс Қазақстан облысы мен Тэджон арасындағы ынтымақтастық өңір басшылары Нариман Төреғалиев пен Ли Чан У арасындағы кездесуде талқыланды. Сондай-ақ өңір басшысы Нариман Төреғалиев Тэджондағы жетекші университеттер КАИСТ және Чуннам басшылығымен кездесіп, жоғары білім саласындағы ынтықмақтастық туралы жоспарымен бөліспек. Алдағы уақытта оңтүстіккореялық компаниялар басшылары өңірдің инвестициялық жобаларымен танысу және өз технологияларымен бөлісу үшін Орал қаласына барады.

Авторлары: Владислав Цой, Ольга Лян