Британия арнайы қызметтері Каспий құбыр консорциумына соққы беруді жоспарлаған

АСТАНА, 16 қазан — Sputnik. Британиялық арнайы қызметтердің нұсқаушылары Каспий құбыр консорциумына ұшқышсыз аппараттар арқылы соққы беруді жоспарлаған.

Бұл туралы Ресей Федералдық қауіпсіздік қызметінің (ФСБ) директоры, ТМД-ға мүше мемлекеттердің қауіпсіздік органдары мен арнайы қызметтері басшылары кеңесінің төрағасы Александр Бортниковтың мәлімдемесіне сілтеме жасап РИА Новости хабарлады.

Ол Самарқанда ұйымға мүше мемлекеттердің қауіпсіздік органдары мен арнайы қызметтері басшылары кеңесінің 57-ші отырысында сөз сөйледі.

Ресейдегі лаңкестік әрекеттер мен диверсиялардың Ұлыбритания арнайы қызметтерінің қамқорлығымен жасалып жатқанына сенімді дәлелдер бар, деді ФСБ басшысы.

"Сонымен қатар SAS (Британия армиясының арнайы бөлімшелері – ред.) және MI6 (Британия барлауы – ред.) нұсқаушылары Ресей, Қазақстан және АҚШ компаниялары акционер болған Каспий құбыры консорциумының кеңселері мен нысандарына ұшқышсыз аппараттар арқылы сериялы соққылар жасауды жоспарлаған", – деді Бортников.

Каспий құбыр консорциумына соңғы кездері украиналық камикадзе дрондары бірнеше рет шабуыл жасады. Соққылардың бірі бірнеше миллиард теңге шығын әкелді. Каспий құбыр консорциумы (КҚК) арқылы Қазақстан мұнайының 80%-ы экспортқа шығарылады, оның көп бөлігін ExxonMobil, Chevron, Eni және Shell сияқты батыс корпорациялары өндіреді.

Сондай-ақ британ арнайы қызметтерінің "Түрік ағыны" газ құбырына қарсы диверсиялық операцияларды дайындап жатқаны туралы ақпарат бар, деді Бортников.