Брюссельде Орталық Азиядағы демография және гендерлік теңдік жөнінде дөңгелек үстел өтті

Брюссельде Орталық Азиядағы демографиялық тұрақтылық, гендерлік теңдік және әйелдер құқықтары мен мүмкіндіктерін кеңейту мәселелеріне арналған жоғары деңгейлі дөңгелек үстел өтті. 

Іс-шараны Қазақстанның Бельгиядағы елшілігі, БҰҰ Халықты қоныстандыру қоры және «БҰҰ-Әйелдер» құрылымы бірлесіп ұйымдастырды. Кездесуге елшілер мен дипломаттар, сондай-ақ Еуроодақ институттарының өкілдері қатысты. Тараптар Орталық Азиядағы БҰҰ-ның рөлін, өңірлік саясатты үйлестіру қажеттілігін, сондай-ақ адами капиталға инвестиция салу, теңдікті дамыту бойынша ортақ тәсілдерді талқылады. 

Қазақстанның Бельгиядағы елшісі Роман Василенко еліміздің демографиялық тұрақтылықты нығайту тәжірибесін айтты. Мәліметтерге сүйенсек, Орталық Азия — халқы шамамен 84 млн адамға тең стратегиялық өңір, 2040 жылға қарай бұл көрсеткіш 100 миллионнан асуы мүмкін. Ал 2050 жылға қарай еңбекке қабілетті адамдар саны 20 миллионға дейін жетуі ықтимал.

Флоренс Бауэр, БҰҰ Халықты қоныстандыру қорының шығыс Еуропа және Орталық Азия бойынша өңірлік директоры: 

- Халық саны өсіп келеді, жастардың үлесі жоғары. Бұл демографиялық дивиденд пен экономикалық өсім үшін зор мүмкіндік береді. Алайда бұл мақсатқа жету үшін адами капиталға, әсіресе әйелдердің құқықтары мен мүмкіндіктерін кеңейтуге инвестиция құю қажет.

Белен Санс Луке, «БҰҰ-Әйелдер» құрылымының Еуропа және Орталық Азия бойынша өңірлік директоры:

- Соңғы жылдары әйелдердің құқықтарын мойындау мен гендерлік теңдік мәселесін заңдар мен нормативтік актілерге енгізу бойынша айтарлықтай ілгерілеуді көріп отырмыз. Біз әйелдердің одан әрі дамып, табысқа жетуін әрі қарай да қолдауға ниеттіміз.