Брюссельде Қазақ мәдени орталығы ашылды

Брюссельдегі елшілік жанынан Қазақ мәдени орталығы ашылды. Жырақта жүрген отандастарымыз үшін бұл жай ғана үйірмеге қатысатын орын емес, Қазақстанмен байланысты нығайтатын мекен болмақ. 

Орталықтың салтанатты ашылуында адам қарасы көп. Ата-аналар балаларын, жастар шетелдік достарын ертіп келген. Көпшілігінің үстінде ұлттық киім. Балалар шашуды тағатсыздана күтуде, ал ең ептілері рәсім басталмай-ақ тәттіге қол созып жатыр. Орталықтың ашылуына Еуропада ұзақ жылдардан бері тұрып жатқан тіліміз бен салт-дәстүріміздің жанашырлары ұйытқы болған.

Аружан Болатбаева, Қазақ мәдени орталығы басшысының орынбасары:

- Осы орталықтың ішінде өзім қазақша сөйлесу клубын жүргіземін және қазақша кітап клубын жүргіземін. Өйткені мен үшін маңыздысы – балаларымыздың қазақ тілін ұмытпауы, оны ұмытуға жол бермеуіміз керек.

Өкінішке қарай, шетелде ана тілін білмей өсіп жатқан қаракөздеріміз көп. Әсіресе асырап алынған балалар арасында бұл өте өзекті мәселе. Әйтпесе қазақ тілі олар үшін кіндік қаны тамған жерімен жалғайтын көпірге айналар еді. Бұл орталықтың берері көп. Одан бөлек шығармашылық сабақтардың да маңызы зор: жиналғандар шеберханада қазақтың дәстүрлі текеметін жасауды үйренді.

⁠Жанна Қосубаева, Бельгиядағы қазақ диаспорасының өкілі:

- Біз қазақтың оюы орнектерімен қазақша текемет жасауды үйреніп жатырмыз. Мынандай әртүрлі оюлармен кішкентай ғана осындай текемет жасаймыз.

Домбыра үйрену сабағы балалардың ерекше қызығушылығын оятты. Ұлттық аспапты қалай дұрыс ұстап, қалай шерту керектігін үйрету үшін елшілік қызметкерлері де білек сыбана кірісті.

Тоғызқұмалақ үстелі жанында жиналған жастар ежелгі зияткерлік ойынның қыр-сырын меңгерді. Тағы бір бөлмеде балаларға қазақ ертегілері таныстырылды. Орталықта тек отандастарымыз ғана емес, шетелдіктер де көптеп жиналды. Олар домбыраның не екенін және кілемдегі ою-өрнектер қандай мағына беретінін білуге асықты.

Орталық тұрақты түрде жұмыс істеп, тіл үйрену сабақтары, шығармашылық студиялар және музыка үйірмелері ұйымдастырылып тұрады. Біреулер үшін бұл — ермек, ал басқалары үшін — өз ұлттық болмысын сақтап қалудың бірден бір жолы. Осылайша, орталық тек мәдениетке баулитын орын ғана емес, Бельгия мен Қазақстанды жақындастыра түсетін бірегей алаңға айналмақ.

Авторлары: Ғалымжан Қараманұлы, Жомарт Ахметов