Доссорда бір отбасы мүшелері газ иісіне уланып қалды

24 қарашада кешкі сегіз шамасында Мақат ауданының Доссор кентінде төтенше жағдай орын алды. Екі бала анасымен бірге газ иісіне уланып, ауруханаға жеткізілді. Қазір олар үйіне жіберілді.

Доссор тұрғыны Айнұр Әсетованың үйінде тұрмыстық газдың иісі тиіп, өзі және екі баласы – 12 жастағы ұлы мен 7 жастағы қызы шұғыл түрде жедел медициналық қызметпен аудандық ауруханаға жеткізілген. Медицина қызметкерлері дер кезінде көмек көрсетіп, балалардың жағдайы тұрақтанған соң оларды үйлеріне жіберді. Ал анасын бақылауда қалдырмақ болған, алайда ол ауруханаға жатудан бас тартты.

- Балаларды қарайтын ешкім жоқ, қолхат жазып, үйге  шықтым, – дейді Айнұр.

Айнұрдың айтуынша, газ мамандары үйге келіп, газ кетіп тұрған жерді жөндеп берген, бірақ газ иісі әлі қалған. 

Оның сөзінше, Мақат ауданы әкімінің орынбасарына газ кетіп жатыр деп айтып жүргеніне төрт апта болған. 

- Бізді еститін үкімет бар болар деп ойлаймын. Біздің жағдайымызға мән береді деген үміттемін, – дейді Айнұр.

... Қайтадан газ мамандары үйге келгенде газ шығып тұрғанына көз жеткізіп, «газ беруді тоқтатамыз, басқа үйде болуыңыз керек» деген. 

- Біздің үй газбен жылыту қазандығы арқылы жылытылады. Мен басқа барар үйім болмағасын «қайда барамыз?» дедім. «Бүгінше өшірмеңдер» дедім. Өшірмей кетіп қалғандықтан түнде уланып қалып тұрмыз. Айналып келгенде, бәрін өзімнен көріп жатыр. ТЖ мамандары бұл жағдайда маған айыппұл салынатынын, бірақ бұл жолы “ескерту береміз” деп тұр. Сосын бір қызығы, түнде қабылдаған хирург келіп, кеше берген қағазымды қайта беріңіз деп, басқа қағаз әкеліп тұр. Мен бермедім. Мені жан-жақтан қысып жатқандай, - дейді Айнұр.  

Дәрігер жазып берген қағазда газге уланды деген жазу бар.

Біз облыстық ТЖД басқармасынан комментарий сұрадық. Былай деп хабарлады: «24 қараша күні сағат 20:50-де Мақат ауданының Доссор кентіндегі Ш. Еркешов көшесіндегі көппәтерлі тұрғын үйлердің бірінде табиғи газбен жұмыс істейтін жылыту пешін пайдалану ережелерінің бұзылуына (тартудың болмауына) байланысты 1984 жылы туған пәтер иесі, сондай-ақ 2012 жылы туған ұлы мен 2018 жылы туған қызының көміртек тотығымен уланғаны туралы жедел жәрдем қызметінен ақпарат түсті».

«АЖ» бұл үй туралы жақында жазған. Тұрғындар үйді апатты деп танып, басқа қауіпсіз баспанаға көшіруді талап етеді.

Облыс әкімдігі баспасөз қызметінен қайталап комментарий сұрадық. Бізге былай деп жауап берді:

«Доссор кенті, Ш. Еркешов көшесіндегі №209 көппәтерлі тұрғын үйі сараптама қорытындысы негізінде апатты деп танылған жағдайда, пәтер беру мәселесі жергілікті атқарушы орган тарапынан қарастырылатын болады. 2025 жылы облыстық бюджет қаражаты есебінен 2 пәтерлі 69 тұрғын үй (138 пәтер) сатып алынды, қазіргі таңда “Отбасы банк” арқылы тұрғындарға табыстау рәсімдері ұйымдастырылуда.

Сонымен қатар, Доссор кентінде “NCOC” компаниясының демеушілігімен 3 қатарлы 60 пәтерлі тұрғын үйдің құрылысы жүргізілуде. Аталған тұрғын үйді жыл соңына дейін пайдалануға беру жоспарлануда.

Ендігі кезекте тұрғын үйі апатты деп танылған 80-ге жуық тұрғынды және барак типтес 106 үйдің 562 тұрғынын жаңа баспанамен қамту мәселесін кезең-кезеңімен шешу қарастырылады.

Жоғарыда көрсетілгендей, аталмыш үйді тұрғындар апатты деп тануы қажет, сондай-ақ әкімдік тарапынан аталған тұрғын үйдің жер телімін рәсімдеу жұмыстары жасақталуда».

Айнұр САПАРОВА

Бүгін, 18:19