Дрондар Ресейдегі ірі интернет дүкеннің қоймаларына шабуыл жасады

18 шілдеге қараған түні Мәскеу облысының Электросталь қаласындағы Wildberries логистикалық орталығына дрондар шабуыл жасады. Мәскеу облысының губернаторы Андрей Воробьевтің мәліметінше, соққы салдарынан қоймада өрт шығып, 24 адам зардап шеккен. Нысан Мәскеуден шамамен 50 шақырым жерде орналасқан.

Сол түні Тамбов облысының Котовск қаласындағы Wildberries қоймасы да соққыға ұшырады. Жергілікті билік түнгі ауысымда жұмыс істеген жеті адамның қаза тапқанын, 25 адамның жараланғанын хабарлады. Зардап шеккендердің бірінің жағдайы аса ауыр, тағы бірнеше адамның жағдайы ауыр деп бағаланып отыр.

Украина президенті Владимир Зеленский шабуыл жасалған екі логистикалық орталық Ресейде дрондар өндіруге арналған қосалқы бөлшектер мен навигациялық жабдықтарды жеткізу үшін пайдаланылғанын мәлімдеді. Ресей тарапы түнгі шабуыл кезінде елдің әртүрлі өңірлерінде 379 дрон атып түсірілгенін хабарлады. Бұл мәлімдемелердің жекелеген тұстарын тәуелсіз түрде растау әзірге мүмкін емес.