Елде ерекше көлік нөміріне сұраныс көп

Автокөлікке «ерекше» нөмір алу рәсімін онлайн форматқа көшіру жоспарланып отыр.

Қазір қалаған әріптер мен сандар комбинациясын тек мамандандырылған халыққа қызмет көрсету орталықтарында таңдауға болады. Қызмет түрі кеше ғана іске қосылса да жұрт тарапынан үлкен қызығушылық тудырды. Алматыда да ерекше нөмірге сұраныс жоғары.

Бұған дейін азаматтар компьютер ұсынған дайын нұсқаны алатын. Ал VIP-нөмірлер қымбатқа сатылатын. Енді жаңа ережеге сай, әріп және сандық комбинацияларды еркін таңдауға мүмкіндік берілді. Қалаған нөмірдің құны таңдалған комбинацияға байланысты.

Жаңа жылдан бастап ең қолжетімді көлік номерлері 12 110 теңге тұрады. Ал егер көлік номерін өзіңіз таңдайтын болсаңыз баға 10 айлық есептік көрсеткіш көлемінде, яғни 43250 теңге тұрады. Ал егер мынандай, «айна» номерлерді қаласаңыз баға 65 мың теңге көлемінде.

Жаңалықты ести сала Мамандырылған халыққа қызмет көрсету орталығына бағыт алған адамдардың қарасы қалың. Тіпті мекеме ашылмай тұрып кезекте тұрғандар да бар. Көбі есімінің алғашқы үш әрпі мен сандарды туған күнімен байланыстырып тапсырыс беруде.

Қадыр Тәліпханұлы, Алматы облысының тұрғыны:

- 770КDR05, тіркеуім облыста. Енді ұнайтын нөмір ғой. Армандаған нөмір. Ұнаған, соны алдық. Ризамын. Ешқандай өкініш жоқ. Алдың, атында қалды. Болашақта нөмірді ұялмай таға аласың ғой.

Ераслан Темірғали, Жамбыл облысының тұрғыны:

- Бүгін 808ERS08 деген нөмірге көзім түсіп, соны алуға келдім. Өзіме 8 дейтін сан ұнайды. Өйткені шексіздіктің белгісі болып саналады.

Бұл ереже 010, 007, 777 сынды VIP-серияларға қолданылмайды. Олар бұрынғыдай бөлек бағада сатылады. Мұндай элиталық нөмірлердің құны 246 мың теңгеден басталады. Мамандардың айтуынша, жаңа бастама автокөлік иелеріне таңдау еркіндігін беріп, рәсімдеуді жеңіл әрі ашық етеді.

Марат Ақжолтаев, Алматы қаласы ПД ӘПБ процессингтік орталығының бастығы:

- Қазіргі таңда көлік иелері мемлекеттік Халыққа қызмет көрсету орталығына тапсырыс бере алады. Алдағы уақытта электрондық портал бойынша немесе мобильдік қосымшалар арқылы тапсырыстарын бере алады. Барлығы таңдалған комбинацияға байланысты. Қарапайым номерлар қолжетімді бағада, ал ерекше сұраныс жоғары әдемі нөмірлер біршама қымбатырақ.

Бұл – автокөлік иелері үшін таптырмас мүмкіндік. Жасанды интеллект және цифрлық даму министрлігінің мәліметінше, «әдемі» нөмірлерге бір күннің ішінде 11 мың қазақстандық өтініш берген. Мамандар: «Қызу сұраныс бір-екі күнде саябырсуы мүмкін», - дейді.

Авторлары: Нұрқанат Атажан, Кенже Амраев