Елде кәсіби офицер құтқарушыларды даярлайтын жалғыз ЖОО бар

Қазақстандағы офицер-құтқарушыларды даярлайтын жалғыз жоғары оқу орны - Мәлік Ғабдуллин атындағы Азаматтық қорғаныс академиясында мыңнан астам курсант бар.

Оқу ордасында ел азаматтарымен қатар Қырғызстан мен Тәжікстаннан келген жастар да білім алады.

Академияда болашақ құтқарушылар тек теориялық біліммен шектелмейді. Интеллектуалды, психологиялық және физикалық тұрғыдан кез келген төтенше жағдайға дайындалған маман ретінде қалыптасады. Бұл оқу орны - Төтенше жағдайлар министрлігіне кадр дайындайтын басты орталықтардың бірі.

Жұмабек Хасенов, Мәлік Ғабдуллин атындағы Азаматтық қорғау академиясының бастығы:

- Болашақ лейтенантымыз кәсіптік жағынан жан-жақты дайын болу керек. Қазіргі заманда тек қана өрт сөндіру және адамды құтқару емес басқа да көптеген жағдайлар болып жатыр. Өндірістік қауіпсіздік, құрылыстық қауіпсіздік деген жағдай бар. Қазір Төтенше жағдайлар министрлігінің 95-96 пайызы осы академияның түлектері. Қазіргі уақыттың өзінде 10 мыңға жуық кәсіпті офицерлерді дайындап шығарған.

Академияда бір мезетте төрт мамандық бойынша оқыту жүргізіледі. Ал командалық құрам үшін үш жыл бұрын магистратура бағдарламасы ашылған. Қазір мұнда Қырғызстан мен Тәжікстаннан келген он шетелдік курсант білім алып жүр.

Кубат Имашбеков, академия курсанты:  

- Мен бала кезімнен құтқарушы болуды армандадым. Себебі әкем мен ағам осы салада еңбек етті. Академия қабырғасында көп нәрсе үйрендім. Оқуды аяқтаған соң туған елге оралып, алған білімімді іс жүзінде дәлелдеймін.

Соңғы екі жылда академияда қыз курсанттар да оқи бастады. Олар ер балалармен тең дәрежеде дайындалып, жоғары нәтижелер көрсетіп жүр.

Дана Мамыртай, академия курсанты:

- Мектептен кейін мамандық таңдау керек болады ғой. Сол кезде «қыздар неге құтқарушы болмайды» деген ой келді. Мен сол кезде ер азаматтармен бірге оқып, бір мамандықта жұмыс істеуді қаладым. Бізде ұлдар мен қыздарды бөліп жармайды. Барлығы бірдей болады. Нормативтерді де бірдей болып тапсырамыз.

Келер жылы академияны 150 түлек аяқтап, төтенше жағдайлар қызметінің сапына қосылмақ. Ал жақын арада Көкшетауда академияның жаңа ғимаратының құрылысы басталады. Жоспар бойынша мұнда жаңа оқу корпустары, спортзал және мәдени-демалыс орталығы салынады.

Авторлары: Аслан Әбутәліпов, Евгений Шинкаренко