Елдегі инфляция теңге мен доллар бағамына қалай әсер етті KASE жауабы

Ресми мәліметке сәйкес, 2025 жылдың 9 айының қорытындысы бойынша Қазақстандағы инфляция 12,9%-ға жетті.

- Бағаның өсуіне ең алдымен, азық-түлік пен сусындардың, сондай-ақ денсаулық сақтау саласында бағаның көтерілуі әсер етті. Инфляцияны төмендету үшін Ұлттық банк базалық мөлшерлемені 18 пайызға дейін, яғни 150 базистік тармаққа көтеру туралы шешім қабылдады. Оның алдындағы өзгеріс биыл наурыз айында болған еді, ол кезде мөлшерлеме 16,5% деңгейінде белгіленген болатын. Сондай-ақ инфляцияның негізгі қозғаушы күштерінің бірі – жанармай бағасының өсуі, ол шамамен 12%-ға қымбаттады. Тек қыркүйек айының өзінде жанармай бағасы 3,4%-ға өсті. Халықаралық нарыққа тоқталсақ, өзге елдер ақша-несие саясатын сақ саясат ұстанып отыр. Дегенмен кейбір орталық банктер ақша-несие саясатын жұмсарту мен мөлшерлемені төмендетуге көшті, – деді Әділ Мұхамеджанов.

Оның айтуынша, теңге бағамына ел ішіндегі инфляция ғана емес, басқа да себептер әсер етіп келеді. Оның ішінде алтын мен мыс фьючерстерінің 47% және 20%-ға өсуі, сондай-ақ Brent және WT маркалы мұнай бағасының 10% және 13%-ға төмендеуі бар.

- Валюталар бағамына келсек, осы жылдың 9 айында қазақстандық теңге 4,7%-ға әлсіреді. Сонымен қатар Brent маркалы мұнайы шамамен 10–20%-ға арзандады. Ал рубль, керісінше, теңгеге қатысты 42%-ға, долларға қатысты 27%-ға нығайды, – деді KASE басқарма төрағасы.

Дегенмен Әділ Мұхамеджанов алдағы кезеңге қатысты оң болжам бар екенін атап өтті.

- Жалпы алғанда Қазақстан экономикасы бойынша болжамдар оң сипатта қала береді. Алайда инфляциялық тәуекел сақталып отыр, – деді ол.

Еске салайық, 2025 жылдың 9 айының қорытындысы бойынша теңгенің АҚШ долларымен орташа бағамы – 548,97 теңге болды.

Бұған дейін Ұлттық банк базалық мөлшерлемені 18%-ға дейін көтерді.