Елді мекендерге серпін беретін форум

Менің мемлекеттік қызметке келгеніме екі жарым жыл болды. Бұған дейін Астанада 20 жыл жеке кәсіппен айна­лыс­тым. Ауылға қызмет ету – әр азамат­тың парызы деп білемін. Сол себепті де елордада кәсібім бола тұра, туған жерге ту тігуді көздеп, өскен өлкеге де бір еңбек сіңірейік деген перзенттік жауапкершілікпен ауылға ат басын бұрдым.

Мен «Amanat» партиясының қолдауымен 2022 жылдың 20 қара­шасында ауыл әкімі болып сайландым. Ауылға қызмет етуге келудегі басты мақсатым аулымыздың көркеюіне үлес қо­сып, тұрмысын дамыту болды. Ке­йін­гі үш жарым жылда ауылда бір­қатар маңызды жұмыс атқарылды. Әсіресе жол мәселесі – бізде өте өзекті де бас­ты басымдықтардың бірі. Биыл 42 шақырымдық Аягөз – Шынқожа – Ақшәулі бағытындағы жолдың 15 шақырымы толық асфальтталды. Қалған бөлігі де кезең-кезеңімен аяқталады деп сенеміз.

Мәдениет үйі, спорт зал, ХҚО, кітапхана күрделі жөндеуден өтіп жатыр. Ауылымыздағы 11 жылдық мектептің жұмысын сақтап қалу үшін өз отбасыммен бірге ауылға көшіп келдім. Бес балам да осында оқып жүр. Бұл – ауыл мектебінің жабылмауына қосқан үлесім.

Бүгінгі форум өте пайдалы болды. Жаңа тәсілдер, алдағы жоспарларды іске асыру жолдары бойынша көп тәжі­рибе алдық. Ауыл үшін ең басты мәсе­ле­лер – интернет, жа­рық, жол, ауызсу. Біз­де су жү­йесі толық тар­тыл­ған, көше­­лердің бар­­лы­ғы жарықтан­ды­­­рыл­ғ­ан. Келесі жылы ауылға тал­шық­ты интернет жүргізу жоспар­­ланып отыр. Сонымен қатар күн қуа­тымен жұмыс істейтін жарықтан­дыру жүйесін енгізуді көздеп отырмыз.

Ауыл шаруашылығы, инфра­құрылым және басқа да салаларды дамыта отырып, ауылдың табиғи ерекшелігін ескере келе туризмді де дамытуды жоспарлап отырмыз. 2026–2028 жылдары демалыс орындары мен тарихи нысандарды абаттандыру арқылы жаңа жұмыс орындарын ашу ойымызда бар.

Жалпы, мұндай форумдар жиі өтсе, халық пен билік арасындағы байланысты нығайтады. Ал біз – осы екі ортаны байланыстыратын көпірміз. Мұнда айтылған жоспарларды жүзеге асыру үшін алдағы уақытта да барымызды салып жұмыс істей береміз.

Жәнібек ТОРТАЕВ,

Ақшәулі ауылдық округінің әкімі

Абай облысы,

Аягөз ауданы