Елге көмек қорының соты: жәбірленушілерге 33 миллион теңге залал келтірілді

Екі айыпталушыға Қылмыстық кодексінің 190-бабының 3-бөлігі 4-тармағы («Аса ірі мөлшерде бірнеше рет жасалған алаяқтық») бойынша айып тағылып отыр.

Бүгінгі сот отырысында төрағалық етуші судья Ернар Қасымбеков сотқа келмеген жәбірленушілердің айғақтарын және келтірілген материалдық шығын туралы деректерді жария етті. Жалпы тергеу барысында 26 қылмыстық эпизод анықталып, олардың барлығы бір іс шеңберінде біріктірілген. Жәбірленушілердің біріне келтірілген залалды айыпталушы Дүйсееваның туыстары толық өтеген, ал Сариев екі жәбірленушіге келтірілген шығынды ішінара өтеген. Осылайша, қазіргі таңда жәбірленушілерге келтірілген материалдық залалдың жалпы сомасы 33,5 миллион теңгеден асқан.

Осыдан кейін Сариевтің адвокаты соттан оның телефонын қарап шығуды сұрап, онда түсірілген бейнежазбаларды көрсетуге ниет білдірді.

— Менің қорғауымдағы адамның телефонында жәбірленушілер мен олардың туыстарымен бірге түсірілген бейнежазбалар бар. Бұл бейнелерді Сариев қайырымдылық жинағын ашу мақсатында өз парақшасында жариялау үшін түсірген, — деді адвокат Кішкенебаева.

Сот отырысы 30 қазанда жалғасады. Онда тараптар айыпталушының телефонын зерттеп, кейін іс бойынша жарыссөз кезеңіне өтеді.

Бұған дейін сотта мемлекеттік айыптаушы қылмыстық іс бойынша айыптау актісін оқыды.

Кейін жәбірленушілер қажылыққа берген қаражатты қайтаруды талап етті.

Сотта айыпталушы Ілияс Сариев өзі де жауап берді. Ол өз айыбын ішінара мойындады.

Одан кейін Ілияс Сариевке екінші сотталушы айып тақты.

Еске салайық, сәуір айында «Елге көмек» қайырымдылық қорының басшысы Ілияс Сариев алаяқтық жасады деген күдікке ілініп, ұсталғанын жазғанбыз. Ол өзін бірнеше рет «қазақтың Робин Гуды» деп атаған және әлеуметтік желідегі парақшаларында музыкант, концерт пен той ұйымдастырушы екені көрсетілген.