Елімізде жол бойындағы қызметтің сапасы артады

Еліміздің орталығы мен батысын тікелей байланыстыратын Орталық-Батыс тасжолының құрылысы басталғалы Қостанай облысының кәсіпкерлері түрлі жоба жасай бастады. 

Нақтырақ айтсақ, олар күрежолдың бойындағы қызметті дамытпақ. Президент IV Ұлттық құрылтайда дәл осы жол құрылысының стратегиялық маңызы зор екенін айтқан еді. Астана мен Ырғыздың арасындағы трассаның ұзындығы 800 шақырымға жуық. Жартысы Торғай өңірі арқылы өтеді. Бұл Торғай өңірінің дамуына да тың серпін бермек. Сонымен қатар аталған жол елімізді Транскаспий арқылы халықаралық көлік бағытына шығуға мүмкіндік береді.  Қазірдің өзінде жол бойында кәсіпкерлік нысандары салына бастады. Мысалы Сағидолла Аяп жолаушылар мен жүргізушілерге кешенді қызмет көрсететін кемпингтің құрылысын бастады. 

Сағидолла Аяп, кәсіпкер:

- Мейрамхана, дүкен болады, вип залы болады, екінші қабаты толықтай жатақхана, қонақ үй, есіктің алдында ағаштан моншалар болады. Содан кейін жеңіл, ауыр көліктердің шиномонтажы болады. Одан кейін бұл жерде бәрін заңды түрде қоршап, тұрақ жасағымыз келеді.

Олжас Өтегенов, қалалық Кәсіпкерлік бөлімінің басшысы:

- Президенттің тапсырмасымен Орталық-Батыс тас жолы салынады деді. Осы Арқалық арқылы өтетінін естіп, біраз кәсіпкерлер қуанды. Жол бойында мейрамхана ашқысы келетіндер, тамақтанатын орындар, қонақ үй ашқысы келетіндерден көп ұсыныстар келіп жатыр. Оның ішінде басып айта алатын бір 7-8 жоба бар.