Елордада балалар әкім шыршасына қатысты

Елордада Астана қаласы әкімінің атынан ұйымдастырылған мерекелік шырша шарасы өтті.

Жиында балаларға арналып түрлі шоу бағдарламалар ұсынылып, ертегі кейіпкерлері кештің көркін қыздырды. 

Жаңа жылдық шырша шарасына 400 оқушы жиылды. Олар оқуда озат, спорт пен шығармашылықта топ жарған белсенді бүлдіршіндер. Кештің кішкентай қонақтарына 20 астам өнерпаз қызмет көрсетіп, түрлі образдарда шоу бағдарма ұсынды. Солардың сапында шетелдік батырлармен бірге Көлтаусар, Ер Төстік, Сақ құлақ сынды қазақ ертегілерінің кейіпкерлері бар.

Назерке Есен, Астана қаласының тұрғыны:

- Бүгін қала әкімі ұйымдастырған шыршаға келіп отырмын. Осындай үлкен әрі маңызды шараға шақырту алғаныма алғысымды білдіремін. Мен мұндай ауқымды мерекеге алғаш рет қатысып отырмын. Сондықтан бұл күн мен үшін ерекше есте қалады. Барша балаларға мықты денсаулық, оқуда сәттілік және арман мақсаттарының орындалуын тілеймін. Жаңа жыл баршамызға бақыт, қуаныш және жаңа жетістіктер әкелсін.

Иә, бүгін бүлдіршіндердің барлығы бірдей сыйлық алды. Оларға Астана қаласының әкімінің атынан қол сөмкелер берілді. Оның ішінде кітап секілді керекті жабдықтар мен тәттілер, сондай-ақ, қаржылай сертификат бар.

Гүлфара Сарамбетова, Астана қалалық Білім басқармасының бөлім басшысы:

- Бүгін әкім шыршасы болып жатыр. Тағы да мектептің ішіндегі шаралар болып жатыр. Жаңа жылдан ешкім қалмайды, бәрі қатысады. Баланың барлығы сыйлық алады. Соның ішінде портфель, кітап, тәттілер бар.

«Шырша шарасының соңы сахналық қойылымға ұласты. Тағылымға толы театрлық туынды жасөспірімдерді зиянды әдеттерден тиып, адамгершілікке үндейді. Бүгінгі кештің басты ерекшелігі де осы», - дейді, ұйымдастырушылар.

Тимур Омаров, ұйымдастырушы:

- Бұл ертегінің маңыздылығы, ерекшелігі осы кейіпкерлер арқылы балаларымызға, өсіп келе жатқан ұрпаққа жақсы қасиеттерді үйрету. Ол дегеніміз үлкендерді құрметтеу, достықты сыйлау, қоршаған ортаны ластамау, алаяқтарға қалай ұрынбау керек екенін бәрін осы ертегінің ішінде айтатын болады.

Иә, қуанса, бала қуансын! Ән ырғағына тербеліп би билеген бүлдіршіндер жаңа жылдық кешті аса қызығушылықпен тамашалады, таңданды. Керемет көңіл күйде тарқасты.

Авторлары: Шернияз Жалғасбекұлы, Арман Ақшабаев