Еңбек министрлігі қайтыс болғандар мен шетелдіктерге зейнетақы төленуін түсіндірді

Қазақстанның Еңбек және халықты әлеуметтік қорғау министрлігі қайтыс болған азаматтар мен шетелдіктерге зейнетақы төлеу туралы бұған дейін тараған ақпаратқа қатысты пікір білдірді. Мұндай фактілер Жоғары аудиторлық палата жүргізген тексеріс нәтижесінде анықталған, деп хабарлайды Tengrinews.kz тілшісі.

Қазақстанның Еңбек және халықты әлеуметтік қорғау министрлігі қайтыс болған азаматтар мен шетелдіктерге зейнетақы төлеу туралы бұған дейін тараған ақпаратқа қатысты пікір білдірді. Мұндай фактілер Жоғары аудиторлық палата жүргізген тексеріс нәтижесінде анықталған, деп хабарлайды Tengrinews.kz тілшісі.

Бұған дейін хабарланғандай, Қазақстанда миллиардтаған теңге зейнетақы қайтыс болғандардың, хабар-ошарсыз кеткендердің, сондай-ақ Ауғанстан, Нигерия және Үндістан тұрғындарының шоттарына аударылып келген. Мәселе 21 миллиард теңге туралы болып отыр. Толығырақ материалдан оқыңыз.

Еңбек және халықты әлеуметтік қорғау министрі Асқарбек Ертаевтың айтуынша, Жоғары аудиторлық палата тексерісті расымен жүргізген, бірақ ақпараттың бір бөлігі нақтылауды қажет етеді.

"Жоғары аудиторлық палата Еңбек және халықты әлеуметтік қорғау министрлігінде 2020 жылдан 2024 жылға дейінгі кезең бойынша тексеріс жүргізді. Нәтижесінде 67 мың алушыға - шетелдік азаматтарға жалпы сомасы 20,8 миллиард теңгеге зейнетақы төлеу фактілері анықталды", - деді Ертаев.

Министрдің сөзінше, қаражаттың бір бөлігі қайтарылды.

"Осы соманың ішінен 57 мың адам 13,5 миллиард теңгені қайтарды. Бүгінде "Азаматтарға арналған үкімет" мемлекеттік корпорациясы 4 400 шетелдік азаматқа қатысты қалған қаражатты - шамамен 6 миллиард теңгені қайтару бойынша жұмысты жалғастырып жатыр", - деп атап өтті шенеунік.

Ол тағы шамамен 500 миллион теңгенің сот арқылы есептен шығарылғанын нақтылады, өйткені бұл қаражатты алған 120 азамат қайтыс болған.

Министр шетелдік азаматтарға төлемдер халықаралық келісімдер аясында жүзеге асырылатынын айтты.

"Қазақстан халықаралық келісімдерге қосылды. Егер шетелдік азамат Қазақстанда жұмыс істеп, аударымдар жасаса және зейнетке шықса, біз оған зейнетақы төлеуге міндеттіміз. Сол сияқты Қазақстан азаматтары да басқа елдерде төлемдер алады", - деді ол.

Шенеунік қаражатты қайтару жұмыстары жалғасып жатқанын айтты.