Еңбек министрлігі: Зейнетақы жинақтарын пайдалануға шектеу енгізілмейді

Еңбек және халықты әлеуметтік қорғау министрі Асқарбек Ертаев қазақстандықтардың зейнетақы жинақтарын емделуге немесе несие жабуға пайдалануына қатысты шектеулер енгізіле ме деген сұраққа жауап берді.

Министр жаңа есептеу әдістемесі бекітілгеніне қарамастан, бұл бағытта қосымша тыйымдар ұсынылмайтынын атап өтті.

«Шектеулер алынбайды, бұл мүмкіндік сақталады. Жаңа жеткілікті шектер енгізілген жағдайда да азамат белгілі бір мөлшерден артық жинаққа ие болса, оны несиеге немесе емге пайдалана алады. Еңбек министрлігі бұл бағыттарды шектеуді ұсынған жоқ», – деді Ертаев Үкіметтегі брифингте.

Оның айтуынша, жаңашылдықтың басты мақсаты – жинақтау жүйесін өзінің негізгі функциясын орындауға мәжбүрлеу. Министр БЗЖҚ-ны қарапайым депозит ретінде қабылдауға болмайтынын, оның мақсаты – азаматтарға зейнетке шыққанда лайықты табыс қамтамасыз ету екенін айтты.

Сонымен қатар, министр есептеу тәсілінің қалай өзгеретінін түсіндірді. Бұрынғы формула тоғыз көрсеткіштен тұрса, жаңасы беске қысқартылды. Енді оған жылдық табыстылық мөлшерлемесі (9%) және ай сайынғы төлемдерді индекстеу ставкасы енгізілді.

Жаңа жеткілікті шектер қашан белгілі болады? 

Ережелерге өзгерістер пакеті енгізілді. Енді заңнамаға сәйкес Бірыңғай жинақтаушы зейнетақы қоры (БЖЗҚ) 20 жастан 63 жасқа дейінгі барлық жас санаттары үшін нақты есептеулер жүргізуі тиіс.

«10 күн ішінде есептеулер енгізіліп, жарияланады. Қазір бұл жұмыс қорда жүргізілуде, министрлікте бұл цифрлар әлі жоқ», – деп түйіндеді Ертаев.

Үкімет минималды жеткілікті шегін анықтаудың жаңа әдістемесін бекітті. Ол маусым айынан бастап күшіне енеді. Қазақстандықтар бұрынғыдай өз жасына белгіленген лимиттен асатын соманы мерзімінен бұрын пайдалана алады.

Бүгін, 14:11