Энергетика министрлігі газ өндіруші компаниялармен 3,5 млрд теңгелік келісімшартқа қол қойды

Құжатқа Энергетика вице-министрі Ерлан Ақбаров, «QazaqGaz» басқарма төрағасының орынбасары Асылжан Даулетов және «СНПС-Ақтөбемұнайгаз» бас директоры Жу Шитао қол қойды.

Келісімшарт аясында 2D және 3D сейсмикалық барлау жұмыстарын жүргізу, сондай-ақ тәуелсіз және тәуелді іздеу ұңғымаларын бұрғылау көзделген.

Геологиялық барлау жұмыстарына салынатын жалпы инвестиция көлемі 3,5 млрд теңгені құрайды. Келісімшарт геологиялық барлау жұмыстарын кешенді түрде жүргізуге мүмкіндік береді. Учаске көмірсутек қорларының жаңа көздерін анықтау тұрғысынан жоғары әлеуетке ие.

Бұл келісім мемлекетаралық экономикалық өзара іс-қимылдың бірізді дамуын көрсетеді және екіжақты ынтымақтастықты одан әрі нығайту мен кеңейтуге тараптардың өзара мүдделілігін растайды.

Айта кетейік, 14 сәуір күні өткен Үкімет отырысында Олжас Бектенов елдің энергия ресурстарына деген сұранысын қанағаттандыру үшін газ өндіру қуатын арттыру қажет екенін атап өтті.