Еркебұлан Тоқтар қырғызстандық файтерден жеңіліп қалды

Қазақстандық файтер Еркебұлан Тоқтар Ереванда (Армения) өткен Hype FC 28 турнирінде өнер көрсетті, деп хабарлайды Arasha.kz сайты Sports.kz-ке сілтеме жасап.

Тоқтар қырғызстандық Марсель Нұрланбек уулумен кездесті. Жеңіл салмақтағы жекпе-жек ММА қолғаптарымен бокс ережесі бойынша өтіп, төрешілердің ауызды шешімімен Қырғызстан спортшысының жеңісімен аяқталды.

Айтпақшы, Еркебұлан Тоқтар Марсель Нұрланбек уулумен болатын айқасқа ерекше тәсілмен шықты. Тоқтарды октагонға арена күмбезінің астынан арқанмен түсірді.

Еркебұлан Тоқтардың аралас жекпе-жектегі кәсіби мансабына келер болсақ, оның қазіргі рекорды - 11-3.

Ол ММА ережесі бойынша соңғы жекпе-жегін өткен жылдың тамыз айында өткізіп, екінші раундта ирандық файтер Фарзад Гадериді (19-17) нокаутқа түсірген болатын.

Марсель Нұрланбек уулуның ММА-дағы статистикасы - 14-0. 2024 жылдың тамыз айындағы соңғы кездесуінде қырғызстандық спортшы өзбекстандық файтер Фарход Эргишбаевты (4-3) нокаутпен жеңген еді.