Фотограф тілші өзі жинаған төсбелгі мен тиыннан шағын музей ашты

Батыс қазақстандық фотограф-тілші Рафхат Халеловтың есімі Орал өңіріне жақсы таныс.

Өз ісінің шебері өңірдегі тарихи сәттерді таспалап, Жайық жылнамасының жазылуына сүбелі үлес қосып келеді. Бала кезден түрлі төсбелгілер мен тиындарға қызығатын ол кейінгі кезде көне бұйымдарды да жинап, өз үйінде шағын экспозиция жасақтапты.

Ерденбек Жылқайдарұлы, тілші: 

- Біз қазір оралдық фотограф-тілші Рафхат Халеловтың шаңырағындамыз. Жайық өңіріне аты мәшһүр азаматтың үйі үй емес, мұражайға көбірек келіңкірейді. 4-5 жасында кәмпит қағаздарын бастап жинаған ол кейін пошта маркілеріне ауысады. Жас филателист бұдан соң нумизматика мен фалеристикаға ден қойып, көне тиындар мен төсбелгілерді жинай бастайды. 

Рафхаттың коллекциясында күні бүгін 700-ден астам төсбелгі бар. Бірқатарын көрмеге сұрап әкеткендер кейін қайтармапты. Содан кейін көне бұйымдардың басын қосып, үйінің бір бұрышынан өзі шағын музей ашуды ұйғарыпты. Өткен ғасырдың 70-жылдары жасалған, шығыстың қос шынары Әлия мен Мәншүк бейнеленген мына төсбелгілерді коллекциясындағы ең құнды жәдігерлер деп біледі. 

Рафхат Халелов, Орал қаласының тұрғыны:

-  Ішіндегі өзіме қатты ыстығы Әлия мен Мәншүк значоктері. Осындай жаңағы кейде әуесқойлар шығарып, сатылымға қояды. Әрқайсының бағалары әртүрлі. Мұны жақсы қымбат бағаға қойды. Осыны алғанша мен мен ұйқым қашты деп айта аламын. Ақыры қолыма түскенде қуандым.

Рафхаттың экспозициясындағы әрбір жәдігер өткеннен сыр шертеді. Ертеден қалған ескі жабдықтар мен өзі қолданған фотоаппараттарды қарай жүріп, суретке түсіру өнерінің дамуынан мол мағлұмат алуға болады. Көне патефондар мен магнитофондар, сағаттар, тиын-теңгелердің де айтары бар. Осының бірін сұрап алса, бірін сатып алыпты. Коллекциясының толығуына ұл-қыздары да көмектесіпті.

Рафхат Халелов, Орал қаласының тұрғыны:

- Енді қандай іс жасасаң да, не бастасаң да, алдымен отбасың ғой. Бәрі риза болып, неге жинадың, неге алдың деп, ондай әңгіме болып көрген жоқ. Керісінше балаларым да, қыздарым да, папа осындай жерде осындай бұйым бар екен, ия болмаса, жәдігер бар, значоктер бар, көрдің бе деп айтып, қодарына түскен болса, өздері де тауып әкеліп, көмектесіп отырады.

Рафхаттың коллекциясын мамандар да жоғары бағалайды. Көне бұйымдарға қызығушылық танытып, өлке тарихына қатысты жәдігерлерді жинақтап жүрген азамат көп емес. Олармен тығыз байланыста жұмыс істейміз, дейді облыстық өлкетану музейінің басшылығы. 

Жантас Сафуллин, облыстық тарихи-өлкетану музейінің директоры:

- Олар да өз мүмкіндігі шеңберінде қолдарына түскен ескілікті жәдігерлерді жинақтап, шағын экспозияция жасап, сонымен музейлердің алғышарттарын жасап жатыр. Бұл біздер үшін өте маңызды, өте қажет. Ссбебі болашақта музей қорларын толықтырған кезде, осындай азаматтармен бірлесе отырып, бірлескен көрмелер ұйымдастыруға мүмкіншілік аламыз.

Келешекте Рафхат Халелов облыс орталығында көрме ашып, өз коллекциясын Жайық жұртшылығына кеңінен таныстыруды жоспарлап жүр.

Е. Жылқайдарұлы, Б. Жарылғасов, Э. Аюпов