Газа секторы қысқа дайын емес

Газа секторы қысқа дайын емес. Халықаралық ұйымдар күн суытқан сайын жағдайдың ушығып бара жатқанына алаңдайды. Өйткені мұнда түнде ауа температурасы минус 6°C-қа дейін барады. Ал өңірде баспанасыз жұрт көп. Мұндайда ауру да тез тарайды. Әсіресе балалар мен қарттар үшін қауіп жоғары.

Газада кейінгі аптада толассыз жауған жаңбыр жағдайды қиындата түсті. Өйткені Израиль күштерінің шабуылдарынан паналау орындары болған мектептер мен ауруханалардың көбі қирап қалған. Нәтижесінде өңірде мыңдаған адам далада шатырларда өмір сүруге мәжбүр. Секторда дәрі-дәрмек, азық-түлік, ауызсу және жанармай тапшы. Оларды жеткізу мәселесі әлі толық шешімін таппай келеді.

Абир Этефа, БҰҰ Әлемдік азық-түлік бағдарламасының өкілі:

- Қылышын сүйретіп қыс та келді. Аймақта мұндай шатырлар адамдарды аяздан қорғай алмайды. Қазір өйңірде 1,6 миллион адам босқынға айналып, аштықтың зардабын тартып отыр. Оларды жедел азық-түлікпен қамтамасыз ету керек. Қажеттіліктер болса, күннен-күнге артып барады.

Газа секторында халықтың 90%-і баспанасынан айырылған. «Ал уақытша баспаналар қыс тұрмақ қара суықта паналауға жарамсыз», – дейді Біріккен Ұлттар Ұйымының Таяу Шығыстағы өкілдік қызметкерлері.

Манал Салим, босқын:

- Біз тұратын шатырлардың әбден тозығы шыққан. Суыққа төтеп бермейді. Қасымызда тұратындардың да жағдайы осындай. Біз тек осы қыстан аман өтуді тілейміз. Бұрын жаңбырды жақсылыққа жорушы едік, енді жаумаса екен деп тілеуге мәжбүрміз.

Өңірде қазір барлық босқындар лагерьлері адамдарға лық толы. Олардың арасында отбасынан айырылып қалған мыңдаған бала бар. Ал кейінгі нөсер жауыннан 13 000 шатыр зақымданған. Осыған байланысты халықаралық ұйымдар аймаққа көмекті шұғыл арттыруға шақырып жатыр.

Ян Эгеланн, NRC Босқындар кеңесінің бас хатшысы:

- Қазір адамдарға көрпе, матрас секілді ең қажетті заттарды жеткізуге күш салып жатырмыз. Ең бастысы жұртты ызғырық жел мен суықтан қорғау. Қиындыққа қарамастан жәрдем көрсетуді тоқтатпаймыз.

Гуманитарлық ұйымдар қыстың қаупін алдын ала ескеріп, Газада дайындықты қазан айынан бастап жүргізген. Аймаққа бір айда 3600 шатыр, 129 мың брезент және 87 мың көрпе жеткізілді. Алайда көмек көлемі сұраныстың шамасына сай емес. Ұйымдар жүк жеткізуді арттырмаса қыс айларында гуманитарлық ахуал тіптен ушығып кетуі мүмкін деп ескертіп отыр.

Авторы: Динара Орынтай