Google салығын сақтамаған онлайн платформалар бұғатталуы мүмкін

Қазақстанда салық талаптарын орындамайтын шетелдік онлайн платформалар мен маркетплейстер бұғатталуы ықтимал.
Бұл туралы Қазақстан Республикасы Қаржы министрлігінің Мемлекеттік кірістер комитеті хабарлады.

Мәліметке сәйкес, елде тіркеуден өтпеген немесе салық төлеуден жалтарған интернет-ресурстарға қатысты шектеу шаралары қолданылуы мүмкін. Әңгіме шетелдік цифрлық сервистерге арналған қосылған құн салығы – «Google салығы» талаптарын орындамаған компаниялар туралы болып отыр.

Қазақстан Орталық Азияда алғашқылардың бірі болып бұл салықты 2022 жылы енгізді. Содан бері цифрлық қызметтерге қатысты салық жүйесі кезең-кезеңімен іске асырылып келеді. Осы уақыт ішінде 120-дан астам шетелдік компания елде салық төлеуші ретінде тіркелген.

Ресми деректерге сәйкес, «Google салығын» енгізгеннен бері бюджетке түскен түсімдердің жалпы көлемі 136 млрд теңгеге жетті. Оның ішінде 2025 жылы 57,6 млрд теңге жиналса, 2026 жылдың қаңтар айында 8,7 млрд теңге түскен.

Соңғы жылдары шетелдік цифрлық сервистердің Қазақстанда тіркелуі артып келеді. Мәселен, 2025 жылы тағы 22 компания салықтық есепке тұрған. Олардың қатарында халықаралық онлайн платформалар – Chess.com, OpenAI, Canva және Okko бар.

Мамандардың айтуынша, мұндай талаптар цифрлық нарықтағы ірі халықаралық компанияларды ұлттық заңнама аясында жұмыс істеуге міндеттейді. Сонымен қатар бұл шаралар мемлекеттік бюджет кірісін арттырумен қатар, цифрлық экономиканы реттеуді күшейтуге бағытталған.