Халықаралық валюта қоры босқындардың Украинаға оралу ықтималдығын бағалады

АСТАНА, 28 ақпан – Sputnik. Қақтығыс жалғасқан сайын босқындардың Украинаға оралу ықтималдығы төмендейді, деп мәлімдеді Халықаралық валюта қорының (ХВҚ) Украина бойынша миссиясының басшысы Гэвин Грей.

"Соғыс неғұрлым ұзаққа созылса, өкінішке қарай, босқындардың оралу ықтималдығы соғұрлым азаяды", - деді ол журналистерге брифингте.

Халықаралық ұйымның өкілі уақыт өте келе украин босқындары өздері орналасқан елдердің жергілікті экономикасына барған сайын сіңісіп кететінін айтты.

"Олардың қаншасы әлі босқын болып, қаншасы сол елде қалатынын айту қиын, өйткені олардың өмірі өзгерді", - деді ол.

Украинаның экономикалық стратегия орталығы өз зерттеулеріне сілтеме жасай отырып, 2022 жылдың ақпан айынан бері елден кеткен украин азаматтарының саны қазір 5,6 миллионға жеткенін хабарлады.