Хан Юнус муниципалитеті: Израиль қаланың 85% ын жойып жіберген

Хан-Юнус қаласының мэрі Алааддин әл-Батта қала әкімдігінің қираған ғимаратының жанында баспасөз мәслихатын өткізді.

— Газа секторының ең ірі қалаларының бірі болып саналатын, аумағы 110 шаршы шақырымды құрайтын Хан-Юнус қаласының 85%-дан астамын Израиль жойып жіберді, — деп мәлімдеді Батта.

Ол қираулар тұрғын үйлерге, ғимараттарға, мемлекеттік және жекеменшік мекемелерге, жолдарға, инфрақұрылымға, сондай-ақ қызмет көрсету және ойын-сауық нысандарына да әсер еткенін айтып, салдарынан жүздеген тонна қоқыс пайда болғанын жеткізді.

— Қоныс аударған тұрғындардың өз үйлеріне немесе үйлерінің орнына қайта оралуы үшін тек Хан-Юнус көшелерінен 400 мың тонна қоқысты шұғыл түрде шығару қажет, — деді мэр.

Сондай-ақ, Израиль екі жылдан астам уақытқа созылған шабуылдар барысында қаланың 85% жолын, яғни 210 шақырым жол желісін жойғанын айтты.

— Израиль 400 шақырымдық су құбыры желісінің 300 шақырымын, ал 200 шақырымдық кәріз жүйесінің 150 шақырымын толықтай жойып жіберді, — деді Батта.

Палестиналық шенеунік Израиль Хан-Юнустағы 136 саябақты, демалыс аймақтарын, жасыл желектер мен муниципалдық нысандарды да қиратқанын хабарлады.

Батта қоқыс мәселесіне де тоқталды.

— Алғашқы бағалаулар бойынша, Хан-Юнус көшелерінде 350 мың тоннадан астам қоқыс жиналып қалған, — деді ол.

Мэрдің айтуынша, муниципалитет қатты қалдықтарды жинау саласында үлкен дағдарысқа тап болған. Бұрын негізгі қалдық жинау орталығы Газа секторының шығысында, Фахура шекаралық елді мекенінің жанындағы Суфа ауданында орналасқан болатын. Алайда Израиль армиясы бұл аймақтан кеткен жоқ.

Батта бұл дағдарысты шешу үшін ресми шаралар қабылдау қажеттігін, геноцидтің зардаптарын еңсеру және қалпына келтіру кезеңіне өту үшін күш біріктіру керек екенін атап өтті. Сонымен қатар, аймақтағы үйінділерді тазарту үшін жанармай, заманауи техникалар мен генераторлармен қамтамасыз етуді сұрады.

Мысырда қол жеткізілген келісімнен кейін Газа секторында 10 қазан күні жергілікті уақытпен 12:00–де атысты тоқтату күшіне енді.

Израиль армиясының жазбаша мәлімдемесінде әскердің «сары сызық» деп белгіленген нүктелерге ішінара шегінуі аяқталғаны айтылды.

Осыдан бұрын Израиль мен ХАМАС арасындағы атысты тоқтату келісімі күшіне енгеннен бері 250 мыңға жуық адам Газа қаласына оралды.