Харватиядағы жарқын жеңіс

Осылайша, 2026 жылы өтетін Еуропа чемпионатына іріктеу турнирін жастар сәтті бастады. Неделишче қаласында өткен ойын 2:1 есебімен аяқталды. Қақпашымыз ойынның екінші жартысында бірнеше тамаша сейв жасап, үш ұпайды жұлып алғаны тағы бар.

Жасөспірімдер жырғаған күн

Иә, жасөспірімдер құрамасының өрендері B лигасындағы іріктеу турнирінде М тобында көш бастап тұр. Бұдан бөлек, кестеде Нидерланд, Албания, Хорватия құрамасы бар. Нидерланд пен Албания тең тарқасып, ұпай бөлісіп үлгерді. Ал Хорватияны тізе бүктірген Қазақстан құрамасының үш ұпайы түгел. Енді жігіттер 14 қараша күні Нидерланд жасөспірімдер құ­рамасымен айқасады. Оған дейін жасөспірімдер арасындағы тартысты кездесу жайына тоқталайық.

Сонымен, 11 қараша күні Бауыржан Сағындық баптайтын құрама «Спортпарк Трате» стадионында Сретен Чуктың командасымен кездесті. Ауа райы да Хорватияға көңіл айтып тұрғандай еді. Күннің бетін бұлт торлап, тұман түскен. Бірақ бұл сәт қазақ балаларының еңсесін түсірген жоқ. Себебі белгілі спорт журналисі Ермұхамед Мәулен айтқандай, қазақ футболы қазақша сөйлегенде ғана айтулы жеңістің куәсі болатыны­мызға көз жетті. Құрама капитаны Дәулет Орынбасар командаластарын жігерлендіргенде рухымыз оянды, білем. «Жігіттер, Хорватияға жайдан-жай келген жоқпыз. Осы ойынды ата-анамыз, туыс-бауырымыз қарап отыр. Елімізге, жақындарымызға жеңіс сыйлап, осы матчты ұтайық. Алға, Қазақстан» дегенінде алғалап алға ұмтылған қара домалақтарды көрдік. Демек, олар ұлттың мүддесі ана тілімен тұтасып жатқанын жақсы біледі. Оны айтамыз-ау, жігіттерді қолдауға келген Қанат есімді жанкүйерді атап өтпесе болмас. Бір өзі қонақтардың секторына тұрып, қолдау білдіріп, дауысы қар­лыққанша «Алға, Қазақстан» деумен болды. Оның жанкешті үнін теледидар алдында отырған сіз бен біз  анық ес­тідік. 

Жігерлі капитан сөзінен кейін қуат алды ма, 2 минутта қорғау­шы Ислам Рақым шабуылшы Расул Әкімов көтерген бұрыштамадан кейін қақпа торын тулатты. Ойыншы­лардың қуанышында шек жоқ. Әрі қарай екі жақ шабуыл шебінде қырқысуды бастады. Өйткені өз алаңында жеңілу хорват өрендеріне ұнамады. 26 минутта сәтті соққы жасауға ұмтылғанымен, қақпашымыз Батырхан Серікбай мүмкіндік бермеді. Айта кеткен жөн, стадиондағы барлық хабарландыру қазақ және хорват тілінде болды. Ал 33 минутта Фриган пенальтиден гол соғып, есепті теңестірді. Өйткені 3 нөмірлі қорғаушы хорваттарға қарсы тәртіп бұзып, төреші айыпдобын белгілеген ді. Бірақ бұл есеп жігіттерге кедергі болған жоқ. Көп өтпей, шабуылшы Расул Әкімов қарсыластың айып алаңында еркін ойқастап, тамаша дриблинг жасап, есепті еселеді. Оның шеберлігіне таңдай қақпағандар кемде- кем. Алдынан тосқауыл  құрып тұрған хорват қорғаушысы да Расулдың  допты ұршықша иіретініне сүйсінді, білем. Өйткені кедергі жасауға дәрменсіз еді. Осылайша, қазақтар есепте алға шықты. Бірақ бұл хорваттардың кері шегінгенін білдірмесе керек. Себебі жерде жатқан үш ұпай жоқ. Сөйтіп, алаң иелері  57 минутта тағы да пенальти орындайтын болды. Алайда біздің қақпашыдан жасқанды ма, дәлдей алмады ма, белгісіз, Бартоловичтің добы қиыс кетті. Осыған шамданды ма, олар  оңынан да, солынан да соққы жаудырды. Бірақ Серікбай дейтін тасқамал алдырған жоқ. Хорват комментаторы да бірнеше мәрте Батырханның тамаша сейв жасап жатқанын атап өтті. Барынша есепті теңестіруге ұмтылғанымен, үш ұпай қазақтың еншісіне жазылды. 

Жасөспірімдердің қуанышында шек болған жоқ. Капитанын ортаға алып, барынша қуанды. Алыстан жеткенде жеңісті жұлып алудың орны бөлек. Тұтас команда жеңістің жолында жұмылып, ұпайдан шашау шығармады. 

2 кездесу күтіп тұр

Айта кеткен жөн, 17 жасқа дейінгі жасөспірімдер құрамасына «Қайрат» академиясынан –  11, «Жас қыран-2009» клубыннан – 5, «Шахтер» клубынан – 5, «Ордабасыдан» –  2 , «Атырау» мен «Ақтөбеден» бір-бір ойыншы шақырту алған. Одан бөлек, Швейцарияның «Сьон» клубынан келген Джан Ходжаоглу бар. Міне, «Қайрат» клубы балалар мен жасөспірімдер футболын дамытуда ерекше үлгі көрсетіп жатыр. Қазақ­станның 19 жасқа дейінгі жасөспірімдер құрамасына алматылық клуб академия­сының 15 түлегі шақырту алған.  Оған қоса еліміздегі «Атлетико Мадрид» клубының академиясы да жас талант­тарды танып, қатарына қосқан. Жанкүйерлер де қай футболшының қайда тәлім алғанын, қай клубқа тиесілі екенін бес саусағындай біліп отыр. Құраманың сырт алаңдағы ойынына қалмай баруға тырысады. 

Қазір жасөспірімдер құрамасы қалпына келу жаттығуына кіріскен. Өйткені алда Нидерланд құрамасымен ойын күтіп тұр. Бұл матч Хорватияның Коториба қаласында «Спортски парк» стадионында өтеді. Аталған кездесуден кейін де жігіттер елге асықпайды. Себебі 17 қараша күні Албаниямен кім мықты екенін сарапқа салады. Матч Неделишче қаласында өтеді. 

17 жасқа дейінгі жасөспірімдер арасындағы Еуропа чемпионатына іріктеу турнирі екі кезеңнен тұрады. Бірінші кезең қорытындысы бойынша өз тобында бірінші және екінші орын алған 14 құрама А лигасында ойнайды. Қалған 26 құрама екінші кезеңде В лигасына түседі. Демек, А лигасындағы құрамалар 2026 жылы көктемде финалдық кезеңге берілетін сегіз жолдаманы сарапқа салады. Жолдама алғандар Эстонияда бақ сынайды.

Қазір А лигасында Черногория,  Италия, Чехия, Солтүстік Македония, Швеция, Шотландия, Испания, Дания, Бельгия, Норвегия, Ирландия, Аустрия, Франция, Румыния, Словакия, Швейцария, Кипр, Солтүстік  Ирландия, Германия, Польша, Исландия, Грекия мен Эстония жолдама алды. Іріктеу турнирінің екінші кезеңіне арналған жеребе 10 желтоқсанда өтеді. Сегіз команда қатысатын финалдық кезең Эстонияда ұйымдастырылады. Қызығы сол, турнир өз жерінде өтсе де, Эстония құрамасы іріктеудің екі кезеңіне де қатысады. 

Әттеген-айы, 17 жасқа дейінгі жасөспірімдер құрамасы Эстониядағы айтулы финалға жолдама ала алмайды. Десе де, В лигасында сәтті өнер көрсетсе, келесі циклде А лигасына өтеді. Осылайша, шешуші кезеңде бақ сынау үшін тағы бір қадам жасай алады. 

Айзат АЙДАРҚЫЗЫ