Хасан Қасымбаевтың соты: айыпталушылар жауап беріп жатыр

АСТАНА, 13 қазан - Sputnik. "Хутор" тобына қатысы бар деген күдікпен ұсталған Хасан Қасымбаевтың сотында айыпталушылардан жауап алынды, деп хабарлайды Sputnik Қазақстан тілшісі.

Талғар аудандық сотында "Хуторға" қатысы бар деген күдікпен ұсталған Хасан Қасымбаевтың соты әлі де жалғасып жатыр. Бұл қылмыстық істе Қасымбаевпен қоса бес сотталушының ісі қаралып жатыр. Олар: Сайлау Ақтанов, Данияр Асқаров, Руслан Әлиев, Мадияр Қалымжанов, Нұрмұхамет Сұлтанбеков. Олар адам ұрлау және денсаулыққа ауыр зиян келтіру және бопсалау баптары бойынша айыпталған. Сотқа шағымданған - Арман Әлімов.

Хасан Қасымбаевқа қандай айып тағылды

Қылмыстық іс материалдарына сәйкес, 2021 жылы маусымда сотталушылар аралас жекпе-жекпен айналысатын Арман Әлімовке қоқан-лоқы көрсеткен. Оны ұрып-соғып, ұрлап әкеткен. Прокурордың сөзінше, жанжалға Әлиевтің "Хасан Қасымбаев мен үшін авторитет емес" деген сөзі себеп болған.

Бүгінгі сот отырысында айыпталушы Руслан Әлиевтен жауап алынды. Ол жәбірленуші Әлімовпен арадағы кикілжің тіпті дау тудыруға келмейтін, ер шекіспей бекіспейдінің кейпінде болғанын айтады.

"Адам ұрлау фактісі болған жоқ. Бетін маскамен жасырды дегеннің бәрі жалған. Ер жігіттер арасындағы болмашы кикілжің. Әлімовтің телефоны қолында болды. Звоноктар келіп, жайбарақат сөйлесіп отырды. Менің адам ұрлау фактісіне еш қатысым жоқ. Арман Әлімов Талғар қаласында атышулы есірткі сатқыш болған. Оны ұрып-соғып, бейнекамераға түсірді дегенге де келіспеймін. Қаншама куәгер келіп түсініктеме берді, бірде-біреуі Әлімовті ұрып-соққанымыз туралы айтқан жоқ", - деді сотталушы Руслан Әлиев.

Әлиевтің айтуынша, жәбірленуші Арман Әлімов көліктен өз аяғымен түсіп, сап-сау кеткен. Тіпті діттеген жеріне жеткізіп салу туралы ұсынысты да қабылдамаған.

"Мен Хасанды мүлдем танымаймын"

Ал екінші сотталушы Сайлау Ақтанов Хасан Қасымбаевты мүлдем танымайтынын айтты.

"Жазамды өтеп жүргенде маған Қасымбаевты танимын деп айт деп қысым көрсетілді. Тіпті Қарағандыдағы қатаң тәртіптегі түрмеге ауыстырып жіберді", - дейді Сайлау Ақтанов.

Ол Заречный ауылындағы түзеу мекемесінде жазасын өтеген.

Айта кетейік, Хасан Қасымбаевпен бірге жауап алынып жатқан бес айыпталушының бесеуі де сотталып, түрмеде жазасын өтеп жүргендер.

"Шерзаттың оқиғасынан кейін прокуратура, ұйымдасқан қылмыспен күрес полициясының қызметкерлері менің қорғауымдағы айыпталушыларға, яғни жазасын өтеп жүрген сотталғандарға барып қысым көрсеткен. Қасымбаевқа қарсы айғақ берсеңдер, осы қылмысқа қатысы бар десеңдер жазаларыңды жеңілдетеміз деген. Қазір оларға қатысты қылмыстық іс қозғалды", - дейді бес сотталушының адвокаты Айдынғали Табылдиев.

Жәбірленуші Арман Әлімов бірнеше рет сотталған. Оған қатысты зорлық-зомбылық, есірткі және тонау бойынша үш рет қылмыстық іс қозғалған.

Арман Әлімов пен Қаржаубай Нұрымов таныс адамдар - адвокат

Ал жәбірленуші Арман Әлімов Шерзаттың әкесі Қаржаубай Нұрымовтың жақын танысы болған дейді Хасанның адвокаты Ерлан Меңдешев.

"Мұның барлығы ұйымдасып, келісілген дүние. Өйткені Қаржаубай Нұрымов сұхбат берген ғимаратта Арман Әлімовтің анасы да сұхбат беріп отыр. Бір-біріне қандай таныстығы барын білмеймін, бірақ бұл ұйымдасқан дүние", - дейді Ерлан Меңдешев.

Арман Әлімов сот отырыстарына қатысып жүрген жоқ.

Хасан Қасымбаевтың қорғаушылары сот процесі басталғалы бері судьяны ауыстыру туралы 9 рет ұсыныс жасаған.

Айта кетейік, Хасан Қасымбаевқа қатысты сот 20 тамызда басталды. Айыпталушылар қатарында алты адам бар.