Хасанбой Дусматов пен Махмұд Сабырхан жұдырықтасуы мүмкін

Қазақ боксшысы Махмұд Сабырхан мен Өзбекстанның даңқты спортшысы, Олимпиаданың екі дүркін чемпионы Хасанбой Дусматов арасындағы жекпе-жек жайлы жаңалық спорт жанкүйерлерін қызықтырып отыр. Бұл туралы Махмұдтың жеке бапкері Ілияс Оралбеков YouTube-тегі "Күнгей.кз" арнасына берген сұхбатында айтты, – деп хабарлайды Aikyn.kz сайты.

– Екі боксшы арасындағы жекпе-жек болуы мүмкін бе?
– Иә, әбден мүмкін. Біз Дусматовтың 55 келіге ауысатынын болжап отырмыз. Егер солай болса, өте қызық жекпе-жек болмақ.
– Олардың физикалық тұрғыдан тең түсетін тұстары бар сияқты, иә?
– Дұрыс айтасыз. Екеуінің бойы мен дене бітімі шамалас. Бірақ Махмұд одан жас әрі жылдам. Дусматов оңай қарсылас емес – ол екі дүркін Олимпиада чемпионы, "Баркер кубогының" иегері әрі әлем чемпионы атанған өте тәжірибелі боксшы.
– Егер осындай жекпе-жек өтсе, жеңіске не әсер етуі мүмкін? Жас мәселесі әсер ете ме?
– Мұнда жастықтың өзі шешуші фактор болмайды. Махмұдтың басты артықшылығы – оның көп әрі дәл соққылар жасауы. Ол жылдам және комбинациялары әртүрлі: жоғарыдан, төменнен, қапталдан ұра алады. Қажет болса, қарсыластан қашып та, алға да жүре алады. Егер қобалжымай, өз боксын көрсете білсе – жеңіс оның жағында болады деп ойлаймын.

Айта кетейік, Париж Олимпиадасында 51 келі салмақта өнер көрсеткен Хасанбой Дусматов қазақ боксшысы Сәкен Бибосыновты төрешілер шешімімен жеңген еді. Сонымен қатар осы додада жеңімпаз атанған.