Home Credit Bank атауын өзгертпек

Home Credit Bank акционерлері үш аптадан кейін банк атауын өзгерту және қайта тіркеу мәселесін қарастырады. 

2025 жылдың 3 қарашасына банктің жыл сайынғы жалпы акционерлер жиналысы (ЖАЖ) жоспарланған. Атауды өзгерту мәселесі осы жиналыстың күн тәртібіне енгізілген. Бұл туралы 13 қазанда өткен банктің директорлар кеңесінің отырысы туралы хаттамада жазылған. Құжат сол күні AIX (Astana International Exchange) алаңында жарияланды.

Сондай-ақ, акционерлер жиналысында банктің директорлар кеңесінің құрамын өзгерту мәселесі де қаралады.

Қазіргі уақытта Home Credit Bank – ForteBank-ке сатылу процесінде. Бұл келісім туралы нарық 2025 жылдың 27 маусымында ресми түрде білді: сол күні Forte Home Credit Bank-тің барлық (100%) акцияларын сатып алуға акционерлерімен «негізгі келісімге» келгенін хабарлады.

2025 жылдың тамыз айының соңында Home Credit Bank-тің негізгі акционері, чехиялық кәсіпкер Иржи Шмейц бірқатар миноритарийлердің үлесін сатып алып, өз пакетін 34,7%-дан 90,1%-ға дейін ұлғайтты. Қалған 9,9% үлес сол кезде PPF Financial Holdings a.s. компаниясына тиесілі болды.

2025 жылғы 12 қыркүйекте Қазақстанның Қаржы нарығын реттеу және дамыту агенттігі ForteBank-ке Home Credit Bank-тің капиталына елеулі қатысуға және ол үшін банктік холдинг болуға рұқсат берді. Сонымен қатар, ForteBank-тің акционері Болат Өтемұратовқа Home Credit Bank-тің ірі (жанама) қатысушысы болуға келісім берілді, ал «Nova Лизинг» АҚ банктік холдинг (жанама) мәртебесін алуға рұқсат алды.

2025 жылғы 23 қыркүйекте ForteBank Home Credit Bank-тің 26,8% жай және дауыс беруші акцияларын сатып алғаны белгілі болды. Қазіргі уақытқа дейін банктің басқа акцияларымен жасалған мәмілелер туралы хабарланбады.

2025 жылдың 1 қыркүйегіндегі деректерге сүйенсек, ForteBank активтер көлемі бойынша ел нарығында 5-орында тұр – 4,75 трлн теңге, ал Home Credit Bank 11-орында, оның активтері 1,19 трлн теңге болған.

ForteBank Болат Өтемұратовқа тиесілі. 2025 жылдың 1 шілдесіндегі жағдай бойынша ол банктің 91,1% иесі. Кәсіпкер Forbes Kazakhstan рейтингтеріне енген:

2025 жылы ең бай қазақстандықтар тізімінде 6-орында, байлығы – $3,7 млрд Ең ықпалды бизнесмендер рейтингінде – 1-орында 2024 жылғы жалға берушілер рейтингінде – 4-орында.