Индонезия полициясы Ломбок аралында атыраулық ерлі зайыптыны қалай ұстады

Индонезияның Батыс Нуса-Тенгара провинциясындағы Ломбок аралында Интерполдың іздеуінде болған 29 жастағы Қазақстан азаматы ұсталды. Бұл туралы жергілікті билік өкілдері 26 ақпанда хабарлады, деп жазады Arasha.kz.

Күдікті SS инициалдарымен танылған. Ол Солтүстік Ломбок полициясының детективтері тарапынан сейсенбі күні Сенару туристік ауылындағы қонақүйдің бірінде қолға түскен. Сенару – Ринджани тауына баратын туристер жиі тоқтайтын танымал бағыт.

Солтүстік Ломбок полициясының бастығы Агус Пурванта қамауға алу операциясы қаңтар айында Интерпол жариялаған "қызыл хабарламаға" және 8 қаңтарда Атырау соты шығарған шешімге сәйкес жүргізілгенін айтты.

"Бұл операция ресми ақпарат негізінде және Ұлттық полицияның халықаралық қатынастар бөлімімен үйлестіре отырып жүзеге асырылды. Барлық рәсімдер Индонезия заңнамасына сай өтті", – деді Агус журналистерге.

Оның айтуынша, бұл іс Индонезияның халықаралық құқық қорғау органдарымен трансшекаралық ынтымақтастыққа бейілді екенін және елдің халықаралық қылмыскерлер үшін паналау орнына айналмайтынын көрсетеді.

Солтүстік Ломбок қылмыстық іздестіру бөлімінің басшысы И. Команг Виландра полиция күдіктінің Сенару ауылында тұрып жатқаны туралы нақты ақпарат алған соң жан-жақты тексеру бастағанын мәлімдеді.

Полиция қызметкерлері келген сәтте күдікті кетуге әрекет жасағанымен, қарсылық көрсетпей ұсталған және қоғамдық тәртіп бұзылмаған.

Сондай-ақ сол жерде болған 30 жастағы Қазақстан азаматы, МА инициалды әйел де ұсталған. Билік өкілдерінің хабарлауынша, оның құқықтық мәртебесі әлі қаралу үстінде.