Инфекциялық ауруларға шалдығатындар көбейді. Себебі неде?

Соңғы жылдары елімізде кей инфекциялық аурулармен сырқаттанушылар саны артқан. Ұлттық статистика бюросының 2019 және 2024 жылдар аралығында 100 мың тұрғынға шаққандағы жүргізген есебінше, көкжөтел жұқтырғандар – 19 есе, скарлатина ауруы – 5,4 есе, вирустық гепатит – 3,1 есе, қызылша – 2 есе көбейген, деп жазады Egemen.kz.

Фото: egemen.kz

Мамандардың айтуынша, инфекциялық ауруға шалдығатындардың басым бөлігі тиісті екпені салдырмағандар екен. 

Сонымен қатар елімізде баласына екпе салдыруға қарсы ата-аналар жыл өткен сайын көбейіп келеді. Мәселен, 2007 жылы 5300 ата-ана баласына екпе салдырудан бас тартса, өткен жылы олардың саны 20 700-ге жеткен. Ал биылдың өзінде 20 000 ата-ана екпеден бас тарту туралы өтінішті толтырған. 

Халықаралық ЮНИСЕФ ұйымының зерттеу дерегіне сай еліміздегі ата-аналардың 60%-ы мұндай шешімді нақты келеңсіз жағдайлардан кейін қабылдаған. 

Ал ересектердің 12%-ы діни себептерге байланысты екпе алмаған болса, тағы  12%-ы екпеге сенімсіздік танытқан. Респонденттердің 6%-ы екпеден бас тартуына әлеуметтік желідегі ақпараттар әсер еткенін мойындаған. 

Жұртшылық арасындағы екпеге қатысты теріс пайымдарды сейілту үшін Қоғамдық денсаулық сақтау ұлттық орталығы екпе салдыру ісі бойынша ресми онлайн-порталды іске қосқан. 

Порталда екпе әсері аутизм ауруын тудырмайтыны туралы ақпараттар жарияланады. Сондай-ақ екпеге қатысты көпшіліктің көкейіндегі сауалдарға жауап беру жүйесі жолға қойылған.