Инфляцияның жеделдеуі халықтың нақты табысын құнсыздандырып отыр Ұлттық банк

- Инфляция – бүгін мемлекеттік саясаттың күн тәртібіндегі ең маңызды мәселе. Қарқынды дамып жатқан экономика жағдайында инфляцияның жеделдеуі халықтың нақты табысын құнсыздандырып отыр. Өкінішке қарай, халықтың нақты табысы төмендеп, ал нақты жалақы деңгейі өзгеріссіз қалған. Соңғы 2,5 жылды алып қарағанда, шілде айында табыс максималды түрде төменденгені байқалды. Әрине, бұл үрдіс жоғары инфляция аясында қалып отыр, - деді ол.

Тимур Сүлейменов сол себепті, инфляцияны төмендету бойынша кешенді жұмыс Ұлттық банк пен Үкімет үшін негізгі міндет болып қала беретінін айтады.

- Инфляция деңгейін бақылау және төмендету бойынша жаңартылған шаралар кешенін әзірлеу барысында Үкіметпен бірлесіп, тарифтік саясат параметрлерін түзету бағытында тығыз баланыс орнатуды жалғастырамыз. Ақша-кредит және макропруденциялық саясат бойынша қосымша шараларды іске асыруды да жалғастырамыз. Бірінші – 2026 жылғы қыркүйекке дейінгі 3 кезеңнен тұратын жоспарға сәйкес, ең төменгі резервтік талаптарды көтеру. Бұл шаралар ақша-кредит саясаты құралдары бойынша сыйақы төлеуге арналған ақша эмиссиясын қысқартып, айналымдағы артық ақшаны азайту арқылы инфляцияға қарсы саясаттың тиімділігін арттырады. Екінші – алтын-валюта операцияларын теңестіру. Осы шара аясында биылғы 9 айдың ішінде 2,3 трлн теңге көлемінде өтімділік алынды. Жыл соңына дейін қосымша 1,4 трлн теңге алу жоспарланып отыр. Бұл эмиссиялық және инфляциялық әсерді төмендетіп, жаңа өтімділіктің пайда болуына жол бермейді, - деді ол.

Оның айтуынша, үшіншіден, тұтынушылық кредиттеу нарығын салқындату бойынша белсенді жұмыс жүріп жатыр.

- Жеке тұлғалардың несиелеріне қатысты секторалды контрциклдік капитал буфері енгізілді. 2026 жылғы 1 сәуірден бастап банктер жеке тұлғалар портфелінің тәуекелмен өлшенген активтерінің 2 пайызы мөлшерінде қосымша капитал буферін ұстап отыруы тиіс. Ол ағымдағы деректер бойынша 463,5 млрд теңге шамасында бағаланады, - деді ҰБ төрағасы.

Бұған дейін Ұлттық банкінің Ақша-кредит саясаты комитеті базалық мөлшерлемені +/- 1 п. т. дәлізімен жылдық 18 пайыз деңгейінде белгілеу туралы шешім қабылдаған еді.