Иранды 37 жыл билеген Әли Хаменеи қайтыс болды

Иранның Жоғарғы рухани жетекшісі аятолла Әли Хаменеи өмірден өтті. Бұл туралы елдің мемлекеттік телеарналары мен ресми ақпарат құралдары хабарлады.

Мәліметтерге сәйкес, оқиға 28 ақпан күні таңертең АҚШ пен Израиль Иранға қарсы әуе операциясын бастаған уақытта болған.

"Ол шейіт болды", – деп хабарлады Иранның мемлекеттік IRNA агенттігі.

Хабарламаға сәйкес, елде 40 күндік аза тұту жарияланды. Сондай-ақ аятолланы еске алу мақсатында алдағы бір апта жұмыс күні емес деп белгіленген.

Әли Хаменеи 1989 жылғы 4 маусымда Иранның Жоғарғы жетекшісі қызметіне тағайындалған. Бұл шешім Иран Ислам Республикасының негізін қалаушы Рухолла Хомейнидің қайтыс болуынан кейін қабылданды.

Бұған дейін, 1981–1989 жылдар аралығында ол Иран президенті қызметін атқарды. Оның президенттік кезеңі Иран–Ирак соғысы уақытында өтті. 1980-жылдардағы соғыс жағдайы, халықаралық оқшаулау және ішкі саяси тұрақсыздық оның саяси тәжірибесінің қалыптасуына әсер етті.

Хаменеи билігі кезеңінде Иран ядролық бағдарламасын дамытуды жалғастырды, аймақтық саясатта белсенді ұстаным танытты. Сонымен қатар Батыс елдерімен, әсіресе АҚШ-пен қарым-қатынасы күрделі сипат алды.

Иранның саяси жүйесінде Жоғарғы жетекші елдің стратегиялық бағытын айқындайтын басты тұлға саналады. Конституцияға сәйкес, президент атқарушы билікті басқарғанымен, маңызды шешімдер Жоғарғы жетекшінің құзыретінде болды.