Кәсіпкерлерді бірыңғай реестрге тіркеу басталды

Қазақстандық тауар өндірушілер 31 қаңтарға дейін тіркеуден өтіп, индустриалды сертификаттарын растауы тиіс.

Енді ғана іске қосылған бірыңғай реестр толық жұмыс істемей жатып, дауға қалды. Мәжіліс депутаттарының айтуынша, отандық өндірушілерді заңдастыратын жүйеде кәсіпкерлерге кедергілер бар. Олардың айтуынша, кейбір бизнес өкілдері үшін реестрге тіркелу қиын, сайт жиі істен шығады, ал уақыт тығыз. Ал бұған жауапты министрлік өкілдері не дейді? 

Биыл “Қазақстандық тауар өндірушілердің бірығай реестрі” ресми іске қосылды. Енді өндірістік сертификаттары бар бизнес өкілдері барлық талаптарға сай екенін растап, арнайы жүйеде тиісті ақпаратты ұсыну керек. Сонда ғана олар отандық өндірушілер қатарына қосылады. Бірақ өткен аптада өңірлерді аралап, халықпен кездескен депутаттар “бұл реестр дұрыс жұмыс істемей тұр” деп, Мәжілістің жаңа жылдағы алғашқы отырысында жүйені сынға алды.

Азат Перуашев, ҚР Парламенті Мәжілісінің депутаты:

- Мен өңірлерді аралап, 20-дан астам кәсіпорынға барып шықтым. Соның біреуі ғана бірыңғай реестрге тіркелген. Тауарды экспорттау үшін тіркеу бір бөлек, ішкі нарыққа өндіру үшін сертификаттау өз алдына бөлек мәселе. Реестрлар жұмыс істемей тұр. Министрлік бұны қалай түсіндіреді? 

Азат Перуашевтың айтқанын Еділ Жаңбыршин де қолдай кетті. Мәжілісмен кәсіпорындардың сертификат алуы кезінде кедергілер барын айтып, жауапты министрліктен мәселенің шешімін сұрады.

Еділ Жаңбыршин, ҚР Парламенті Мәжілісінің депутаты:

- Кәсіпкерлермен кездестік, үлкен проблема реестрге кіріп, сертификат алу деген. Ертең коллапс болайын деп тұр. Бір ай уақыт бергенсіздер. Үлгере алмай жатыр жұрт деген. Анау сайттарың да деген құлап жатыр. Оны қалай жөндейсіңдер? Себебі ол жерге видео грузить ету керек. Қарайған материал грузить ету керек. 

Өз кезегінде өнеркәсіп және құрылыс вице-министр жүйе қалыпты жұмыс істеп тұр деп жауап қатты. Оның айтуынша, отандық тауар өндірушілердің реестрі ішкі нарықты қолдау мақсатында құрылды. Ол өндірістік саясат аясында іске қосылып, отандық өнімді қорғау құралы ретінде қарастырылады.

Олжас Сапарбек, ҚР Өнеркәсіп және құрылыс вице-министрі:

- Бүгінде бізде 1900-ден астам кәсіпорын индустриалды сертификаттарын растады. Бұдан бөлек, 3000 астам компания тіркеуге өтінім берген. Бұл бірыңғай реестрдің құрылуы дұрыс шешім болғанын дәлелдейді. Біз бірыңғай тізілімді бюракратиялық кедергілерді жойып, отандық өндірушілерді тіркеу үшін жасадық. Және кәсіпорындардың көбі реестрге кедергісіз қосылып жатқанын көріп отырмыз. Әрине құрал-жабдықтар мен жұмыс орындар бойынша ақпаратты растай алмай отырған компанияларда сұрақтар туындауы мүмкін. Оларға арнайы колл орталық пен телеграмм канал қосылған. Түсіндіру жұмыстары жүргізіліп жатыр. 

Вице-министрдің айтуынша, бұл импорттық тауарды “Қазақстанда жасалған” деп халықты алдап сататындармен күресіп, шынымен де өз елімізде өнім шығаратындарды қолдауға бағытталған жүйе. Кәсіпорын өзінің өндіріс қуатын, жұмыс орын санын, шығындары мен өндіріс барысы жайлы ақпарат беріп, электронды цифрлық қолтаңба арқылы өндірістік сертификаттарын растауы керек. Сол арқылы бизнес субъектіні отандық тауар өндірушілер реестріне тіркейді. Бұл компаниялар реттелетін сатып алуларға қатысып, мемлекеттік қолдау алады. 

Ғазиза Мұхамеджанова, Асхат Қарақойшиев