Кімдер зейнетке жақын, ал кімдер 30 ында орда бұзды ? Шенеуніктер рейтингі жұртты таңғалдырды

Ranking.kz басылымы Қазақстандағы ең жасы үлкен және ең жас шенеуніктердің тізімін жасады. Рейтингке тек жоғары буын мемлекеттік қызметкерлері енгізілді: министрлер, олардың орынбасарлары, облыс және облысқа қарасты қалалардың әкімдері, сондай-ақ республикалық деңгейдегі ірі мемлекеттік құрылым басшылары.

Бірден айта кетсек, бұл тізімге енгендер ішінен зейнеткерлік жасқа жеткен екі ғана шенеунік бар. Олар – Орталық сайлау комиссиясының төрағасы Нұрлан Әбдіров пен Экология және табиғи ресурстар министрі Ерлан Нысанбаев. Екеуінің де жасы – 64-те.

Ерлан Нысанбаевтың зейнет жасына жетсе де, қызметін жалғастыруы бұған дейін де журналистердің сұрағына арқау болған. Министр сын пікірлерге жауап беріп: "Қуатым, білімім мен тәжірибем барда неге жұмыс істемеске? Жастардың жолын бөгеп отырмын деп ойламаймын", – деген еді.

Жыл соңында зейнеткерлер қатарына тағы бір шенеунік қосылмақ – Ішкі істер вице-министрі Игорь Лепеха. Ол Үкімет кулуарында ең салқынқанды, өткір сұрақтарға эмоциясыз жауап беретін шенеуніктердің бірі ретінде танылған. Ол әйелдердің "ұзын тілі туралы" резонансты пікірге де сабырмен жауап беріп, Қостанайға қатысты сепаратистік мәлімдемелерді бірден тоқтатып отырды. Сонымен қатар "ақылды бағдаршамдар" ғана кептеліс мәселесін шеше алмайтынын ашық айтқан.

63 жасқа биыл Жетісу облысының әкімі Бейбіт Исабаев та толады. Оның 40 жылға жуық қызметінде басылым редакторы, президенттің баспасөз хатшысы, бірнеше елдегі елші және сенатор болған кезеңдері бар.

Алдын ала зейнет жасына жақындағандар санатына сегіз шенеунік кіреді. Арасында Бас прокурор Берік Асылов, облыс әкімдері – Марат Ахметжанов, Нариман Төреғалиев, Құмар Ақсақалов бар.

Айрықша атап өтерлігі – Құмар Ақсақалов. Ол жұмысқа жаяу барады. Бұл қарапайым қазақстандықтар үшін қалыпты жайт болғанымен, өңір басшысы үшін халықпен ашық байланыс орнатудың айқын белгісі саналады. Солтүстік Қазақстанды басқарған жылдары да ол қала орталығымен жаяу жүрген, тұрғындар кез келген уақытта тоқтатып, сұрақ қоя алатын. Сол үшін халық арасында "халықтың әкімі" деген атақ алған.

Ұлттық статистика бюросының дерегіне сәйкес, облыс әкімдерінің орташа жалақысы – шамамен 1,7 млн теңге. Бұл – үстемеақылар мен қосымша төлемдерді есептемегендегі сома. Министрлер мен олардың орынбасарларының жалақысы аздап төмен – 1,5 млн теңге.

Дереккөздің мәліметінше, ең жас шенеуніктердің тізімін жасау әлдеқайда қиын болған екен. Өйткені үкіметтегі кадрлар құрамы жиі жаңарып отырады. 

Қазіргі шенеуніктердің бір бөлігі – министрлердің орынбасарлары және облыс орталықтарының әкімдері. Олардың жасы – шамамен 30-35 аралығында, мемлекеттік қызметтегі тәжірибесі – 9-15 жыл.

Қазақстандағы ең жас жоғары дәрежедегі шенеунік – Оқу-ағарту вице-министрі Асылбек Ахметжанов. Ол тәуелсіздік жылдары туған, "Алтын белгі" иегері атанған, бар-жоғы 9 жыл ішінде түрлі министрліктерде жетекші сарапшыдан басқарма басшысына дейін өскен.

Екінші орында – 33 жастағы Түркістан әкімі Әзімбек Пазылбекұлы. Ол – марқұм Бердібек Сапарбаевтың жиені. Төрт жоғары білімі бар. Әр дипломды жұмыс істей жүріп алған – оқуды 2-4 жыл аралығында аяқтаған.

Үздік бестікке Қайырхан Тұтқышбаев, Дмитрий Мун, Бекболат Молдабеков сияқты 34 жастағы түрлі министр орынбасарлары да енді.