Көкжайлауға баратын жол үшін Алматы тауларында 2,2 мың ағаш кесіледі

Алматыдағы болашақ «Көкжайлау» тау шаңғысы кешеніне баратын жол құрылысы үшін шамамен 2,2 мың ағашты кесу және 15 жер учаскесін мемлекет меншігіне алу қажет болады, деп хабарлайды Arasha.kz.

Тау шаңғысы кешеніне баратын автожолдың жобалық құжаттамасында ұзындығы 6,2 шақырым болатын екі жолақты трасса салу қарастырылған. Жұмыстың жалпы сметасы 38,2 миллиард теңгені құрайды.

Жобаны іске асыру аясында сегіз көпір өткелі мен 21 су өткізу құбырын салу жоспарлануда. Сондай-ақ жалпы ұзындығы 3,3 шақырым болатын тіреуіш конструкцияларды тұрғызу көзделген.

bes.media басылымының хабарлауынша, алынатын жер учаскелері Көкшоқы шағын ауданында орналасқан. Оларды босату тау шаңғысы курортына баратын көлік артериясын жүргізу үшін қажет.