Көзсіз батырлық: ШҚО да ер адам өртеніп жатқан үйге кіріп, көршісінің балаларын құтқарып қалды

Глубокое ауданына қарасты Черемшанка ауылында жеке тұрғын үйден өрт шықты, – деп хабарлайды Aikyn.kz.  

Тілсіз жау үйдің шатырын, жиһаздарын және жеке заттарды шарпыған. Өрт болған кезде үйде анасының қарауынсыз төрт бала болған. 2012 және 2019 жылы туған екі үлкен бала өздері үйден шығып, көмек сұрап көрші үйге жүгірген. 

Көршісі Дмитрий Недозрелов, бір сәтке де ойланбастан, жанып жатқан үйге кіріп, іште қалған 2021 және 2023 жылы туған екі сәбиді сыртқа алып шықты. Оқиға орнына дереу жеткен өрт сөндірушілер жалынды 45 шаршы метр аумақта ауыздықтады. Төтенше жағдайлар министрлігі баспасөз қызметі мәліметінше, балалар медициналық мекемеге жеткізілді. Қазіргі уақытта өрттің себебі анықталып жатыр. 

Өзінің батырлығын көпке жария еткісі келмеген Дмитрий бұл әрекетін былай деп түсіндірді: «Менің орнымда кез келген ер адам дәл солай істер еді», — дейді ол.

Сараптама, зерттеу мақала, күнделікті өзекті ақпаратты «Айқынның»  TELEGRAM арнасынан табасыз.