​Күмәнді хикая: Атырауда мұнай қалдығы туралы видеодан кейін ағынды сулар тексерілді

Атыраудағы сол жағалаудағы тазарту құрылғыларында түсірілген видео жұртшылықтың қызу талқысын тудырды. Видео авторы ағынды судың бетінде мұнай қалдықтары қалқып жүргенін, ал өлшеу құрылғысы зиянды заттардың мөлшері нормадан асып кеткенін айтқан. Кейін экологтар өлшем жүргізіп, олардың нәтижелері бұл мәліметтермен сәйкес келмеген.

«Шығарынды 27 қыркүйекте төгілген»

«Единство - Право и Честь» («Бірлік – Құқық және Ар») қоғамдық бірлестігінің өкілі әрі «Атырау облысы Су Арнасы» КМК-ның сыбайлас жемқорлыққа қарсы комплаенс-офицері Жанат Кенжеғұловтың айтуынша, 27 қыркүйекте сол жағалаудағы кәріздік-тазарту нысандарына ластанған сарқындылар төгілген. 30 қыркүйекте ол оқиға орнына барған.

«Қараңыздар, мынау бетінде қалқыған – мұнайлы қалдықтар. Газанализатор көміртек тотығының көрсеткіші нормадан жүз есе жоғары екенін көрсетті. Біз сынама алдық, алдын ала талдау мұнай өнімдерінің барын растады. Бұл – тұрмыстық емес, өндірістік қалдық», – дейді ол.

Видеода ол «көміртек тотығының нормадан жүз есе асқанын» айтады, алайда газ талдағыш құрылғының экранында H₂S — күкіртсутегі көрсеткіші көрінеді. Бұл — тазарту құрылғыларының маңында жиі сезілетін “шіріген иісі” бар газ.

Ол иіс пен сула қалқыған заттың КНС-17 арқылы келетін өндірістік ағынды сулармен байланысты болуы мүмкін екенін топшылап, «Batys Petroleum» мен «РТИ-АНПЗ» ЖШС кәсіпорындарын атайды. Кенжеғұлов сынамалардың зертханаға жіберілгенін мәлімдейді.

Белгілі болғандай, талдау Кенжеғұлов жұмыс істейтін «Атырау облысы Су Арнасы» КМК-ның өндірістік-техникалық зертханасында жүргізілген. Алайда ол жердегілер бұл құжатты «Ақ Жайық» редакциясына көрсетпеді.

Бекер жасады, себебі ол құжат кейін «Қазгидромет» Атырау облыстық филиалының мамандары жасаған ресми талдаумен салыстыру үшін өте пайдалы болар еді. Олар да сол тазарту нысандарынан сынаманы сәл кейін — 3 қазанда алған.

Зертханалық талдау нәтижесі бойынша, судың құрамындағы мұнай өнімдерінің мөлшері 0,005 миллиграмм/дм³-тен аз болған. Бұл — рұқсат етілген шектен ондаған есе төмен көрсеткіш.

«Бұл учаскедегі ағынды сулар мұнай өнімдері көрсеткіші бойынша экологиялық қауіп тудырмайды», — деді облыстық экология департаментінің аға маманы Ардақ Оралова.

Видеодағы құрылғы нені көрсетті

Кенжеғұлов өлшеу кезінде пайдаланған газанализатор ауадағы газдардың құрамын, соның ішінде күкіртсутегін анықтауға арналған. Мұндай құрылғылар органикалық қалдықтардың ыдырауы кезінде пайда болатын иістің жоғары деңгейін көрсете алады, бірақ судың химиялық жолмен ластанғанын анықтай алмайды.

Сондықтан құрылғы шынымен де ағынды сулардың үстіндегі жағымсыз иісті тіркеген болуы мүмкін, алайда бұл деректер мұнай өнімдерінің бар екенін дәлелдемейді.

Мәнмәтін

Бейнежазбада Кенжеғұлов бір жағынан «Бірлік — Құқық және Ар»* қоғамдық бірлестігінің төрағасы ретінде, екінші жағынан балансында екі тазарту кешені бар «Атырау облысы Су Арнасы» КМК-ның сыбайлас жемқорлыққа қарсы комплаенс-офицері ретінде көрінеді. 

Ал осы уақытта, 11 қарашада сотта «Атырау Су Арнасы» кәсіпорнына қатысты алдын ала талап арыз бойынша тыңдау өткізу жоспарланған. Істе кәсіпорын тазартылмаған ағынды суларды оң жағалаудағы «Квадрат» булану алаңына төгуге қатысты жауапкер ретінде өтеді. 

Бірақ су бетінде қалқыған нәрсеге қатысты осы оқиға, өлшем жүргізу және жедел тексерулер бәрібір біртүрлі әсер қалдырды. Бәлкім, дабыл тым кеш қағылған шығар, бәлкім, тексеру жай формалдылық болған шығар.

Қалай болғанда да, көкейде сауалдар қалып қойды:

Неліктен «Су Арнасы» нормадан асып кетуді көрсеткен талдау нәтижесін БАҚ-тан соншалықты жасырып отыр?»

Ал егер «Қазгидромет» талдауы бойынша бәрі қалыпты болса, неге Атырауда әлі де жағымсыз иіс бар?

Анастасия ШЕРСТЯНКИНА

Бүгін, 11:50