Лукойлдың шетелдік активтер бойынша Carlyle мен мәмілесі бұзылды

Ресейлік «Лукойлдың» американдық Carlyle инвестициялық компаниясымен топтың шетелдік активтерін сату туралы келісімі 2026 жылдың шілде айының соңында өз күшін жойды.

LUKOIL International GmbH компаниясының 2025 жылғы есептілігінен белгілі болғандай, мәмілені АҚШ Қаржы министрлігінің Шетелдік активтерді бақылау басқармасы — OFAC мақұлдамаған, деп хабарлайды Interfax.

Енді LUKOIL International компаниялар тобын сатуы мүмкін басқа да мүдделі тараптармен «қарқынды келіссөздер» жүргізіп жатыр.

«Лукойл» Carlyle-мен келісім туралы 2026 жылдың қаңтарында жариялаған болатын. Келісім бойынша ресейлік компания шетелдік активтерінің басым бөлігіне иелік ететін еншілес құрылымы — LUKOIL International GmbH сатылуы тиіс еді. Бұл ретте «Лукойлдың» Қазақстандағы активтері бастапқыда мәміле ауқымына кірмеген және топта қалуы тиіс болатын.
«Лукойл» шетелдік активтерін сатуға әзірлікті 2025 жылдың қазанында АҚШ компанияны және оның бірқатар еншілес құрылымдарын санкциялық тізімге енгізгеннен кейін бастады. Бастапқыда сатып алушы Gunvor трейдері болуы мүмкін еді, бірақ бұл мәмілені де АҚШ Қаржы министрлігі мақұлдамады.

Санкциялар енгізілген сәтте «Лукойл» Қазақстан, Әзербайжан, Өзбекстан, Ирак, Египет, БӘӘ және бірқатар басқа елдердегі мұнай-газ жобаларына қатысқан еді.

Кеше, 7 қазанда, Қазақстан Президенті Қасым-Жомарт Тоқаев «Лукойлдың» негізін қалаушы Вагит Алекперовпен кездесті. Кездесуде компанияның Қазақстандағы ағымдағы қызметі және бірлескен мұнай-газ жобалары бойынша әрі қарайғы ынтымақтастық мәселелері талқыланды.

9 қазан, 09:18