Маңғыстауда қарақұрт шаққан қыз бала 10 күн бойы жансақтау бөлімінде жатты

Маңғыстауда екі жасар қыз бала улы қарақұрт шаққаннан кейін жансақтау бөліміне түсті, деп хабарлайды Tengrinews.kz тілшісі Lada.kz сайтына сілтеме жасап.

Қолда бар мәліметтер бойынша, ойын кезінде басқа кішкентай бала оған өрмекшіні берген және қыз оны жұтып қоюы мүмкін еді. Қасында болған алты жасар бала оның өрмекші екенін айтқан. Кейінірек бүлдіршіннің жағдайы күрт нашарлап, оған шұғыл медициналық көмек қажет болды.

Қыз бала аудандық ауруханадан облыстық балалар ауруханасына медициналық авиация желісі бойынша жеткізілді. Анестезиология, реанимация және қарқынды терапия бөлімшесінің меңгерушісі Мереке Бекбаевтың айтуынша, баланы ауыстырмас бұрын дәрігерлер аудандық әріптестерімен телемедициналық кеңес өткізіп, әрі қарай емдеу тактикасын талқылаған.

Дәрігерлер қарақұртқа қарсы сарысу егіп, науқасты шұғыл түрде облыс орталығына жеткізу туралы шешім қабылдады. Қыз баланы реанимациялық бригаданың сүйемелдеуімен жасанды тыныс алу аппаратымен тасымалдаған.

Ауруханаға түскен кезде баланың жағдайы өте ауыр деп бағаланды. Қыз бала бірінші дәрежелі комада болды. Дәрігерлер дереу қарқынды терапияны бастап, консилиум өткізді және республикалық мамандармен қосымша консультациялар ұйымдастырды. Емдеу барысында қарақұртқа қарсы сарысу екі рет егілген.

Бүлдіршін он күн бойы жансақтау бөлімінде жатты. Осы уақыт бойы дәрігерлер мен медбикелер оның жағдайын тәулік бойы бақылап, ем-дом шараларын реттеп отырды. Бірте-бірте оң өзгерістер байқалды: қыз бала комадан шығып, өздігінен тыныс ала бастаған, сөйтіп оны жасанды тыныс алу аппаратынан ажыратқан.

Жағдайы тұрақталғаннан кейін науқас бейінді бөлімшеге ауыстырылып, онда тағы төрт күн болды. Содан кейін қыз бала үйіне шығарылған.

Бізді Google-дың негізгі дереккөздер тізіміне қосыңыз