Мәжіліс бірқатар құжатты ратификациялады

Екі ратификациялық құжатты депутаттарға Сауда және интеграция министрінің міндетін атқарушы Айдар Әбілдабеков таныстырды.

Еуразиялық экономикалық одақтың кедендік аумағынан әкетілетін тауарлардың шығарылған жерін айқындаудың үйлестірілген жүйесі туралы келісім 2023 жылғы 4 желтоқсанда Мәскеуде жасалған. Құжатта ЕАЭО шегінен тыс әкетілетін тауарлардың шығу тегін айқындау мен растаудың бірыңғай қағидалары нақтыланады.

– Келісім ЕАЭО-ға мүше мемлекеттердің аумағынан тауарларды, соның ішінде Қазақстан Республикасының аумағынан әкетуге тыйым салу мен шектеу қойылған тауарларды әкету кезінде тарифтік және тарифтік емес реттеу шараларының қолданылуын бақылау мүмкіндігін қамтамасыз етеді. Осы құжат аясында ЕАЭО-ға мүше мемлекеттер белгілеген тарифтік емес реттеудің біржақты шараларының сақталуын ЕАЭО-ға мүше мемлекеттердің бақылап отыруына мүмкіндік жасалады, – деді Айдар Әбілдабеков.

Аталған заң жобасы бойынша жұмыс тобының жетекшісі Болатбек Нажметдинұлы өзінің қосымша баяндамасында атап өткендей, Келісім нормаларында тауарларды Еуразиялық экономикалық одақтың кедендік аумағынан әкету кезінде олардың шығу тегін анықтау, куәландыру және растау тәсілдерінің бірізділігін қамтамасыз етуге бағытталған.

Талқылау барысында депутаттар жаңа ережелер қазақстандық тауар өндірушілер үшін сертификаттауға қосымша шығын әкелмейтінін, экспорт пен импорт кезінде қазақстандық тауардың мәртебесі қалай бақыланатынын сұрады. Мәжілісмендер сондай-ақ салалық министрліктердің өкілдеріне тауарға электрондық құжаттарды енгізу, отандық тауар өндірушілер тізілімін тіркеудің қазақстандық жүйесіндегі кемшіліктерді жою және тағы басқалары туралы сұрақтар қойды. 

Техникалық регламент талаптарының сақталуына мемлекеттік бақылауды (қадағалауды) жүзеге асыру қағидаттары мен тәсілдері туралы келісімге өзгерістер енгізу туралы хаттамаға 2024 жылғы 8 мамырда Мәскеуде қол қойылған. Бұл құжат ЕАЭО құқығы мен одаққа мүше мемлекеттердің ұлттық заңнамалары арасындағы қайшылықтарды жоюға, сондай-ақ кәсіпкерлерге қатысты беделдік сын-қатерлердің ықтималдығын төмендетуге бағытталған.

Атап айтқанда, заң жобасы бойынша жұмыс тобының жетекшісі Айтуар Қошмамбетов түсіндіргендей, бұл құжатта Келісімнің тұжырымдамасы нақтыланады. Мәтіннің барлық жеріндегі «қауіпті өнім туралы» деген сөз «Одақтың техникалық регламенттерінің талаптарына сәйкес келмейтін өнім туралы» деген сөзбен ауыстырылады.

Сонымен қатар Мәжіліс өз кезегінде «Сайлау туралы «Қазақстан Республикасының Конституциялық заңына өзгерістер мен толықтырулар енгізу туралы» Консти­туциялық заң жобасы бойынша Парламент палаталарының бірлескен комиссиясының құрамын жасақтады. Оның құрамына депутаттар Марат Башимов, Мұрат Ергешбаев, Снежанна Имашева және Үнзила Шапақ енді.

Мәжіліс жұмысқа 11 жаңа заң жобасын қабылдады. Олардың қатарында «Алатау қаласының арнаулы мәртебесі туралы» Конституциялық заң жобасы, машина жасауды дамыту, жол қауіпсіздігін цифрландыру және жүргізушілерді даярлау саласындағы кәсіпкерлік қызмет, мемлекеттік қызмет туралы, инвестициялық қорлар туралы мәселелер бойынша түзетулер, сондай-ақ бірқатар ратификациялық жоба бар. 

Жалпы отырыс соңында мәжілісмендер мемлекеттік органдарға өзекті әлеуметтік және экономикалық тақырыптар бойынша 10 депутаттық сауал жолдады. Олардың барлығы Мәжілістің ресми сайтында және Telegram-арнасында қолжетімді. 

Айна ХАСАН