Мәжіліс депутаты Азат Перуашев Тараз көтерме тарату орталығына барды

Қазақстанның «Ақ жол» демократиялық партиясының төрағасы, Парламент Мәжілісінің депутаты Азат Перуашев бастаған партияның Бақылау-ревизиялық комиссиясының төрағасы Болат Өтепбаев, партия филиалының жетекшісі әрі Астана қалалық маслихатының депутаты Асқар Смағұлов Жамбыл жеріне арнайы сапармен келді, деп жазады Egemen.kz.

Азат Тұрлыбекұлы «Ақ жол» демпартиясының Жамбыл облыстық филиалында мәслихаттардағы депутаттардың ағымдағы жұмыстары жөнінде кеңес өткізді.

«Бүгінде Жамбыл өңірінде облыстық, қалалық және аудандық маслихаттарда партиямыздың атынан 19 депутат қызмет етуде. Өткен аптада Қостанайда барлық деңгейдегі мәслихат депутаттарының форумын өткізген болатынбыз. Кеңес отырысында осы жиында көтерілген мәселелерді қортындылап, өңірлердегі әріптестеріміз үшін өзекті проблемаларды талқыладық.

Партияластар тарифтер мен монополистердің өкілеттігін асыра пайдалануын, инфляция мәселесі және халық тұтынатын тауарларды (киім, аяқ киім, азық-түлік) өндірушілерді, ауыл шаруашылығы өнімдерін қайта өңдеушілерді қолдау қажеттілігі, сондай-ақ кеден саясатының тұрақтылығы мен болжамдылығы мәселелерін көтерді. Қант зауыттарының бірінде агроөнеркәсіптік кешендегі жағдай бойынша кеңес өткізу туралы ұсыныс жасалды. «Ақ жол» демпартиясы фракциясынан «Жергілікті мемлекеттік басқару туралы» заң жобасын талқылауға барынша қатысып, депутаттар мен мәслихаттардың өкілеттіктерін кеңейту мен күшейтуге қол жеткізуді сұрады. Олар мәслихат төрағаларының депутаттар қызметін шектеу бойынша жоспарларына, мысалы, түсініксіз сылтаулармен сессияларға қатысуды шектеу мәселесіне алаңдаушылық білдірді.

Өңірдегі өкілдеріміз Парламенттің алдағы конституциялық реформасын қолдайды. Президент Қ.Тоқаевтың АҚШ-қа сапарын қызығушылықпен талқылап, Жамбыл облысының өнеркәсібі мен агроөнеркәсіптік кешеніне шетелдік инвестициялардың өсуін атап өттік», - дейді Азат Перуашев.

Бұдан соң Азат Тұрлыбекұлы бастаған топ: партияның Жамбыл облыстық филиалының, облыстық мәслихаттағы тұрақты комиссияның төрағасы Мұқанбетәлі Шалқарбеков, облыстық мәслихаттың депутаты Дәурен Ахметжаев және Тараз қалалық мәслихатының депутаттары Руслан Мырқалықов, Бауыржан Найзақұлов, Шахан Байкенжеевпен бірге Тараз көтерме тарату орталығына барды.

Халық қалаулыларын орталықтың құрылтайшысы Алтай Карабеков қарсы алып, инфрақұрылым, логистикалық мүмкіндіктерін таныстырды. Сондай-ақ аймақтағы азық-түлік қауіпсіздігін қамтамасыз етудегі орталықтың рөліне тоқталып өтті.

Тараз көтерме тарату орталығы – ауыл шаруашылығы өнімдерін жинақтап, сақтау және аймақтық нарыққа тиімді таратуға арналған заманауи кешен. Мұнда салқындатылған сақтау қоймалары, жүк түсіру мен жөнелту алаңдары, сондай-ақ өнім сапасын бақылау жүйелері қарастырылған. Бұл орталықта 10 мың тоннаға дейін көкөніс өнімдері сақталады.

Осы арқылы аймақ тұрғындарына көкөніс өнімдерін тиімді бағада таратуға мүмкіндік бар. Бұл бір жағынан баға бағамын тұрақтандыруға септігі мол.

Азат Тұрлыбекұлы орталықтағы жұмыс процесімен танысып, орталық арқылы ауыл шаруашылығы өнімдерін тұтынушыға тікелей жеткізетін тетіктерге, фермерлермен өзара әрекеттесу мен логистика саласындағы туындайтын мәселелерге назар аударды.

Бүгінде Тараз көтерме тарату орталығында жалға алу негізінде Rich Gold компаниясы да өз жұмысын жүргізіп отыр. Заманауи кәсіпорын жеміс-жидектерді өңдеп,  шырын, пульпа, пюре және концентраттар өндіреді. Компания өндірілетін отандық өнімдердің үлесін арттырып, ауыл шаруашылығын дамытуға үлес қосуды көздейді.

Кәсіпорын жеміс өсіретін дихандармен тығыз әріптестік орнатқан. Осы арқылы ауыл шаруашылығы өнімдерін өндірушілердің өнімдерін сатып алып, олардың еңбегін тиімді етуге көмектесіп келеді. Rich Gold-тың өндірге табиғи, экологиялық таза және пайдалы өнімді тұтынушылар тарапынан үлкен сұранысқа ие.