Медқызмет пен дәрі чектерінде ЖСН көрсетілуі мүмкін

ҚР Қаржы министрлігі бақылау-кассалық машиналарды қолдану тәртібіне өзгерістер енгізуді көздейтін жоба әзірледі. Құжатқа сәйкес, медициналық қызметтер мен дәрі-дәрмек ақысын төлеу кезінде чекте пациенттің жеке сәйкестендіру нөмірін (ЖСН) көрсету міндеттелуі мүмкін.

Тиісті бұйрық жобасы «Ашық НҚА» порталында жарияланды. Жоба 2026 жылғы 29 сәуірге дейін қоғамдық талқылауға шығарылды. Құжатта 2025 жылғы 24 қазандағы №626 «Бақылау-кассалық машиналарды қолдануға қатысты кейбір мәселелер туралы» Қаржы министрінің бұйрығына өзгерістер енгізу қарастырылған.

Жаңа түзетулерге сәйкес, кассалық чектің міндетті деректемелер тізбесіне медициналық қызметтер мен дәрі-дәрмек үшін төлем жасағанда пациенттің ЖСН-ін көрсетуге арналған қосымша жол енгізіледі.

Бұл бастама Премьер-Министрдің Әлеуметтік медициналық сақтандыру қоры мәселелері бойынша берген тапсырмасын орындау аясында әзірленген.

Өзгерістердің негізгі мақсаты – есеп айырысудың ашықтығын арттыру және Әлеуметтік медициналық сақтандыру қоры қаражатының мақсатты әрі тиімді жұмсалуын бақылауды күшейту. Қаржы министрлігінің мәліметінше, бұл жаңашылдық мемлекеттік кірістер органдарының ақпараттық жүйелеріндегі деректерді сәйкестендіруге мүмкіндік береді. Сол арқылы саладағы көлеңкелі экономиканың үлесін азайтуға ықпал етеді.

Сондай-ақ кассалық чектерде пациенттің ЖСН-ін көрсету бюджет қаражатын бақылауды күшейтіп, медициналық қызмет саласындағы қаржылық ашықтықты арттырады.

Ал жобаның түсіндірме жазбасында бұл өзгерістердің әлеуметтік-экономикалық немесе өзге де теріс салдары болмайтыны айтылған.

Айта кетейік, жыл басынан бері әлеуметтік міндеттемелерге мемлекеттік бюджеттен 1,8 трлн теңге бөлінген.