Менің символдарым мақтанышым

Маңғыстау облыстық медициналық колледжінде «Қазақстан экологиялық қоры» жүзеге асырып отырған «Qazaq Symbols: Кеше, Бүгін, Ертең» атты әлеуметтік жобасы аясында «Менің символдарым – менің мақтанышым» атты танымдық дәріс ұйымдастырылды.

Дәрістің негізгі мақсаты – жас ұрпаққа Тудың, Елтаңба мен Әнұранының терең мағынасын ұғындыру, әрбір элементінде жатқан тарихи тамыр мен рухани мәнді түсіндіру және мемлекеттік рәміздерді құрметтеу мәдениетін қалыптастыру, ұжымдық рухты нығайту және патриоттық идеологияны кеңінен тарату.

Шараға 50-ге жуық студент қатысып, ой-пікірлерін бөлісті. Жастар мемлекеттік рәміздер туралы викторина сұрақтарына жауап беріп, елдік сана мен патриотизм тақырыбында пікір алмасты. Дәріс барысында еліміздің рәміздері туралы бейнероликтер көрсетіліп, қатысушыларға арнайы ақпараттық материалдар таратылды.

Колледж студенттері бұл кездесудің тәрбиелік маңызы зор екенін атап өтіп, мұндай шаралар жастардың еліне деген сүйіспеншілігін арттыратынын атап өтті. Мемлекеттік рәміздің мәні – елдің еңсесін көтеріп, халықтың рухын биіктету. Туымыз желбіреп, Елтаңбамыз жарқыраған сайын, Әнұранымыз шырқалған сайын әр азаматтың жүрегін мақтаныш пен бірлік сезімі кернейді. Сондықтан мұндай жобалар тек тәрбиелік шара емес, ұлттық рух пен елдік сананы нығайтудың нақты тетігі саналады.

«Qazaq Symbols: Кеше, Бүгін, Ертең» әлеуметтік жобасы тек бір дәріспен шектеліп қалған жоқ. Қоғамдық қор «Қазақстан экологиялық қорының» бастамасымен және Маңғыстау облыстық білім басқармасы мен оқу-әдістемелік бөлімінің қолдауымен өңір мектептері мен колледждерінде мемлекеттік рәміздердің мәні мен маңызын насихаттауға бағытталған бірқатар ауқымды іс-шара өткізілді. Атап айтқанда, интерактивті сабақтар, ашық дәрістер, көрмелер, конференциялар, патриоттық челлендждер мен викториналар ұйымдастырылды. Оқушылар мен студенттер эссе жазу, сурет салу және шығармашылық байқауларға қатысу арқылы өз елінің рәміздеріне деген сүйіспеншілігін өнер мен сөз арқылы жеткізді.

Сонымен қатар жобаның маңызды бағыттарының бірі ретінде мемлекеттік және квазимемлекеттік ұйым қызметкерлеріне арналған тренингтер, шеберлік сабақтар мен практикалық семинарлар өткізілді. Семинар барысында қатысушылар еліміздің мемлекеттік рәміздерінің тарихы, авторлары мен олардың символдық мазмұны туралы терең мәлімет алып, тәжірибелік талқылаулар жүргізді. Жоба аясындағы осындай кешенді іс-шаралар Маңғыстау облысы мен Жаңаөзен қаласының білім беру ұйымдарында, мәдени мекемелерінде және еңбек ұжымдарында кеңінен жүзеге асуда. Ұйымдастырушылардың айтуынша, бастама алдағы уақытта да жалғасын тауып, өңірдің басқа да елді мекендерін қамтитын болады. Жоба «Мемлекеттік рәміздерді насихаттау және олардың маңызын түсіндіру» басым бағыты бойынша жүзеге асуда. Іс-шара Жаңаөзен қаласы әкімдігінің қаржыландыруымен, Маңғыстау облыстық білім басқармасы мен оқу-әдістемелік бөлімінің қолдауымен өтті. 

Мемлекеттік рәміздерді құрметтеу – тәуелсіз елдің әрбір азаматының борышы. Сондықтан «Qazaq Symbols: Кеше, Бүгін, Ертең» жобасы ел рухын көтеріп, жастар мен қоғам арасында патриоттық сана мен ұлттық бірегейлікті қалыптастыруға зор үлес қосып келеді.

Инабат АРМАНҚЫЗЫ