Microsoft OpenAI технологияларына эксклюзивті қолжетімділіктен айырылды

Компания жаңа келісім аясында өз технологияларын тек Microsoft платформасында ғана емес, сонымен қатар Amazon Web Services және Google Cloud сияқты бәсекелес бұлтты платформаларда пайдалануға жол ашты.

Reuters мәліметінше, Microsoft OpenAI-дің негізгі бұлтты серіктесі болып қала береді және 2032 жылға дейін компанияның зияткерлік меншігіне лицензиясын сақтайды. Алайда енді корпорация стартап технологияларына эксклюзивті қолжетімділікке ие емес және OpenAI өнімдерінен түсетін барлық табысты өз бұлтында бөлу процесіне толық қатыспайды.

Жаңартылған келісім бойынша OpenAI Microsoft-пен бөлісетін табыс көлемі шектелген және енді жасанды жалпы интеллектіні (AGI) жасау секілді белгілі бір технологиялық кезеңдерге қол жеткізуге тәуелді болмайды.

БАҚ мәліметінше, бұл өзгерістер серіктестік құрылымын жеңілдетіп, OpenAI-дің корпоративтік нарықтағы коммерциялық мүмкіндіктерін кеңейтуге бағытталған. Бұған дейін компания өз шешімдеріне сұраныс жоғары болғандықтан Amazon инфрақұрылымын да қолдана бастаған.

Сарапшылардың айтуынша, эксклюзивті шектеулердің алынуы OpenAI сервистерін AWS және Google Cloud жүйелеріне техникалық кедергілерсіз оңай интеграциялауға мүмкіндік береді.

Осы өзгерістер аясында бұлтты жасанды интеллект секторындағы бәсеке де күшейіп отыр. Енді корпоративтік клиенттер OpenAI шешімдерін Anthropic секілді бәсекелес өнімдермен қатар қарастыра алады.

Бұған дейін OpenAI басшысы әлемді жасанды интеллект экономика мен күнделікті өмірге әкелетін ауқымды өзгерістерге дайын болуға шақырған еді. Атап айтқанда, жұмыссыздық бойынша жәрдемақыны арттыру, қайта даярлау бағдарламалары және салық жүйесін өзгерту мәселелері сөз болған.

Сондай-ақ биыл OpenAI Қазақстанның 165 мың педагогіне тегін лицензия беретінін хабарлады.