Мұнай табысы бюджетке оң әсер етті Энергетика министрі

Үкімет отырысында Энергетика министрі Ерлан Ақкенженов мұнай-газ саласындағы көрсеткіштердің төмендеу себептерін түсіндірді.

Министрдің мәліметінше, 2026 жылдың алғашқы үш айында 3,67 млн тонна мұнай өнімдері өндірілген. Бұл өткен жылдың сәйкес кезеңімен салыстырғанда 98,9%-ды құрайды. Жыл қорытындысы бойынша өндіріс көлемі 15,49 млн тоннаға жетеді деп болжанып отыр.

Сондай-ақ елде мұнай өңдеу қуаттарын арттыру жұмыстары жалғасуда. Атап айтқанда, жаңа мұнай өңдеу зауытын салу жобасы жеделдетіліп жатыр. Бұдан бөлек, ірі кәсіпорындарды кеңейту көзделген: Павлодар зауытының қуаты 9 млн тоннаға дейін, Шымкентте 12 млн тоннаға дейін, ал Атырауда 6,7 млн тоннаға дейін ұлғайтылмақ.

Министрдің айтуынша, мұнай-газ химиясы өнімдерінің өндірісі де төмендеген. Үш айда 134 мың тонна өнім өндіріліп, бұл өткен жылмен салыстырғанда 86,1%-ды көрсеткен.

Сонымен қатар ҚазМұнайГаз және KPI зауытымен бірлесіп, полипропилен өндірісін арттыру жұмыстары жүргізілуде. Биыл өндірісті 450 мың тоннаға жеткізу жоспарланса, 2026 жылға болжам – 580 мың тонна.

Министр мұнай-газ саласындағы көрсеткіштердің төмендеуін Каспий құбыр консорциумы мен Теңіз кен орнындағы жағдайлармен байланыстырды.