Мұқасан Шахзадаев Нұр Мұқасанның жаңа әншісін қан жоса етіп ұрып тастады

АЛМАТЫ, 24 қараша – Sputnik. "Нұр-Мұқасан" тобының жаңа әншісі Ғалымжан Жолдасбайды бірнеше адам жабылып соққы жыққан, деп хабарлайды Sputnik Қазақстан тілшісі.

Өнер иесінің айтуынша, оны топтың бұрынғы әншісі Мұқасан Шахзадаев көк ала қойдай сабап кеткен.

"Ол кісі маған хабарласып, сіздерді сотқа бердім, біздің әнді рұқсатсыз алдың деді. Бүгін кел деді, мен кино түсіріп жатқандықтан, 2-3 күн уақыт беріңіз, арасында бос уақыт тауып барамын дедім. Барып мән-жайды түсіндірдім, негізі түсінді. Нұрлан келіссе, келісем деді. Ертесі қасындағы кісілері келді, сыныптасы келді. Әңгіме жараспай бара жатқан соң, бұрылып шығып кеттім. Қақпадан шығып бара жатқанымда өзі ұрып бастады, жанындағы екеуімен жабылды. Менің жанымдағы көмекші інім 102 шақырды", - дейді Ғалымжан Жолдасбай.

Оның айтуынша, полиция соққы бергенді емес, жәбір көргендерді алып кеткен. Ғалымжан Жолдасбай Мұқасан Шахзадаев жазадан құтылып кетуі мүмкін дейді.

Полиция қылмыстық іс қозғаған.

"22 қарашада Наурызбай аудандық полиция басқармасына жергілікті тұрғын арызданып, азамат М және өзге де бірнеше адам өзіне дене жарақатын салғанын жеткізді. Бұл факт бойынша қылмыстық іс қозғалды", - дейді Алматы қалалық полиция департаменті.

Қазір тергеу жүріп жатыр.