Мұздағы қауіпсіздік қатаң бақыланады

Атырауда қысқы балық аулау маусымы қыза түсті. Жайық өзенінде мұз ойып, қармақ салған әуесқой балықшылардың қарасы көбейген.

Дегенмен қауіпсіздік шараларын бәрі бірдей ескере бермейді. Оқыс жағдайдын алдын алу үшін облыстық Төтенше жағдайлар департаментінің мамандары бақылауды күшейткен.

Атыраулық зейнеткер Тоқтасын Ержановтың ермегі осы. Әуесқой балықшы мұз ойып, қармақ салуды әдетке айналдырған. Келген сайын қармағы қанды боп, олжалы қайтады.

Тоқтасын Ержанов, қала тұрғыны:

- Бұйырған балық түседі. Бұйырғанын көріп жатырмыз. Былтыр да сазан, судактар жақсы шықты. Биыл да сол. Халық енді риза. Халықтың қазір көп жүріп жатқаны, рыбец жүріп жатыр, сосын сазан, судак жүріп жатқаны. Бұрындары судак деген қымбаттап кеткен. Тіпті болған жоқ. Көрген жоқпыз. Енді биыл да қалай су келді, содан бері судактар жақсы шығып жатыр.

Жайықтың беті демалыс күндері әуесқой балықшыға толады. Соңғы жылдары балықтың түрі көбейді. Тіпті бір кездері жоғалып кеткен су маржандары да қайта оралған.

Биыл атыраулықтар көксеркеге қарық болды. Бұрын сирек кездесетін. Қазір көбейді,- дейді тұрғындар. Мұнда балық аулауға келгендердің олжасыз қайтқаны аз. Мұз үстінде балық аулау біріне хобби болса, енді бірі үшін нағыз кәсіпке айналған.

Демалысты пайдалы өткізген дұрыс-ақ. Бірақ қауіпсіздік ережелерін сақтауды естен шығармаған жөн. Қазір мұздың қалыңдығы барлық жерде бірдей емес. 10 сантиметрден 17 сантимерге дейін қатқан. Бұл тұрғындардың өміріне қауіпті,- дейді мамандар. Осыған байланысты Төтенше жағдайлар департаментінің қызметкерлері әуесқой балықшыларға үнемі ескерту жұмыстарын жүргізеді. Ал ескертуді елемегендерге айыппұл салынады.

Айтқали Байтүгелов, облыстық ТЖД Басқармасының бас маманы:

- Балықшының құтқару кеудешесі болса, 2 метр таяқ болса, телефон қаптамасы болса, целлофан қаптама, свистогы болса, оған рұқсат етіледі. Кезекшілікке 20 қызметкердің үстінде шығады күнделікті күнде. Бүгінге дейін мұздағы қауіпсіздік бойынша 2 адамға айыппұл салынды. Айыппұл салу емес, біздің мақсат – тұрғындардың қауіпсіздігі, адам өмірінің қауіпсіздігін сақтау.

Қысқы балық аулау – табиғатпен тілдесіп, оған етене жақын болу үшін таптырмас мүмкіндік. Дегенмен қауіпсіздік шараларын қатаң сақтау керек. Белгіленбеген аумақтарға шықпау, құтқару құралдарын бірге алып жүру маңызды,- дейді құтқарушылар.

Авторлары: Асланбек Шығыр, Амантай Мәтенов, Жандос Рахметуллин