НАТО ның Украинаға жыл сайынғы көмек жоспарына бес мемлекет келіспеді The Telegraph

Ұлыбритания, Франция, Испания, Италия және Канада НАТО елдерінің Украинаға жыл сайын ЖІӨ-нің 0,25 пайызы көлемінде әскери көмек бөлу туралы ұсынысын қолдамаған. Бұл туралы The Telegraph басылымы дереккөздерге сілтеме жасап хабарлады.

НАТО бас хатшысы Марк Рютте бұл бастама жеткілікті қолдау таппағандықтан жүзеге аспайтынын мәлімдеген. Ол ұсынысты Анкарада өтетін альянс саммитінде бекітуді жоспарлағанын айтқан. Алайда НАТО шешімдері барлық мүше елдердің бірауызды келісімін талап етеді.

Басылым мәліметінше, Нидерланд, Польша, Солтүстік Еуропа және Балтық елдері Украинаға ЖІӨ-нің 0,25 пайызы немесе одан да көп көлемде көмек көрсетіп отыр. Ал Ұлыбритания премьер-министрі Кир Стармер жыл сайын кемінде 3 миллиард фунт бөлінетінін айтқанымен, бұл көрсеткіш шамамен ЖІӨ-нің 0,1 пайызына тең.