Наурыз ипотекасына алғашқы үш сағатта 2200 ден астам өтінім түсті

    2025 жылдың 1 қарашасында Отбасы банк «Наурыз» және «Наурыз Жұмыскер» тұрғын үй бағдарламалары бойынша өтінім қабылдауды бастады.
Банк мәліметінше, тек алғашқы үш сағаттың ішінде 2218 қазақстандық өтінім берген.һһ

Оның ішінде 813 өтінім алғашқы сағатта сәтті тіркелсе, қалған 1128 өтінім қазір қаралу үстінде. Өтінім берушілердің көбі Астана, Алматы және Шымкент қалаларында пәтер сатып алуды көздеп отыр.

Банк дерегінше, қатысушылардың 73 пайызы – 35 жасқа дейінгі жастар.

«Жалпы өтінім берушілердің басым бөлігі – кәмелетке толмаған балалары бар отбасылар. Бағдарламаға барлық қазақстандықтар қатыса алады: әлеуметтік осал топ өкілдері, жұмыс істейтін жастар, жас отбасылар, тұрғын үй төлемін алушылар, сондай-ақ моноқалалар мен ауыл тұрғындары» делінген Отбасы банк хабарламасында.

Бағдарлама шарттары

«Наурыз» бағдарламасына қатысу үшін үміткерлерге келесі талаптар қойылады:

Отбасы банкте депозиттің болуы (ашылған уақыты маңызды емес); Жинақ шотында кемінде 2 млн теңге болуы немесе осы соманы өтінім алдында салу; Соңғы 5 жылда тұрғын үйдің болмауы (ерлі-зайыптылар мен кәмелетке толмаған балалар атында); Соңғы 6 айда ресми табыстың болуы.

Өтінім қабылдау 2025 жылдың 1 желтоқсанына дейін жалғасады.

Бағалау жүйесі

Өтінімдер қабылданған соң қатысушыларға автоматты түрде балл есептеледі.

Балл беру критерийлері:

Әлеуметтік осал топ мәртебесі – 10 балл; Балаларының болуы – 10 балл; Некеде болуы – 5 балл; 35 жасқа дейінгі қатысушы – 5 балл; Депозиттегі әр 1000 теңге үшін – 1 балл.

«Наурыз Жұмыскер» бағыты

«Наурыз Жұмыскер» бағдарламасы бойынша өтінім қабылдау 2025 жылдың 3 қарашасында басталды. Бұл бағытта конкурс өткізілмейді. Қатысушылар тек жұмыс орны туралы анықтама тапсыруы тиіс.

Бағдарлама 1 143 қызмет түрін және 8 230 мамандықты қамтиды.

Несие шарттары

Бағдарлама аясында берілетін несие шарттары:

Бастапқы жарна: дайын пәтер үшін – 10%, черновая немесе екінші нарықтағы пәтер үшін – 20%; Сыйақы мөлшерлемесі: әлеуметтік осал топтарға – 7% (ЖТСМ 7,1–9,6%); басқа азаматтарға – 9% (ЖТСМ 9,4–13%); Несие мерзімі: 19 жылға дейін; Ең жоғары несие сомасы: Алматы мен Астана үшін – 36 млн теңге, басқа өңірлер үшін – 30 млн теңге.

Пәтерді сатып алумен қатар, қатысушылар жөндеу жұмыстарына несие ала алады. Оның сомасы тұрғын үй несиесінің 20%-ынан аспауы тиіс.

Baspana Market арқылы таңдау

Бағдарлама қатысушылары тұрғын үйді otbasybank.kz сайтындағы Baspana Market платформасынан таңдай алады. Қазір онда 627 нысаннан 10 000-нан астам пәтер ұсынылған.

Бағалар нарықтық деңгейде тексеріліп, келісілген соң ғана порталға енгізіледі. Бұл механизм пәтер бағасының жасанды өсуін болдырмауға мүмкіндік береді.

Отбасы банк төрағасы Ләззат Ибрагимованың айтуынша, 2025 жылдың алғашқы он айында «Наурыз» және «Наурыз Жұмыскер» бағдарламалары 6 920 қазақстандықтың жаңа баспана алуына мүмкіндік берген.