Назарбаевтың шетелге шығуын шектеу ұсынылды. Бапи бастамасының мәні неде?

Мәжіліс депутаты Ермурат Бапи ұлттық қауіпсіздікті қорғау мақсатында мемлекеттік құпияларды білетін бұрынғы жоғары лауазымды тұлғалардың шетелге шығуын заңмен реттеуді ұсынды. Бұл бастама экс-президент Нұрсұлтан Назарбаевтың Мәскеуге сапарынан кейін қылаң берді, деп хабарлайды Arasha.kz.

Депутат Ермурат Бапи өзінің әлеуметтік желідегі парақшасында экс-президенттің соңғы кездегі іс-әрекеттеріне қатысты өткір пікір білдірді. Оның айтуынша, кезінде елді жеке дара басқарған тұлғаның бүгінгі «делебесі қозып, шетелге ағылуы» ұлттық мүддеге қайшы келуі мүмкін.

«Бұл не қылған әбігер?! Мемлекеттік құпияларды білетін тұлғалардың (мейлі ол экс-президент, министр немесе өзге лауазымды адам болсын) шетелге шығу мүмкіндігін заңмен реттеу қажет шығар? Бұл – ұлттық қауіпсіздікті қамтамасыз етудің жолы», — деп жазды депутат.

Бапи бұл мәселені көтере отырып, Қытай мемлекетінің тәжірибесіне ұқсас шектеулерді енгізу мүмкіндігін қарастыруды ұсынды. Ол заңгер әріптестерінен мұндай қадамның халықаралық міндеттемелер мен конвенцияларға қаншалықты қайшы келетінін сұрады.

Депутаттың пікірінше, ел қауіпсіздігі үшін экс-президенттен бастап, Қожамжаров сынды басқа да бұрынғы шенеуніктерге арналған «шекаралық қызыл сызық» белгіленуі тиіс. «Мұндай қадамның саяси астарын Кремль қалай қабылдайтынын білмеймін, бірақ экс-президенттің бұл әрекеттерін мемлекеттік билік пен халыққа сес көрсетуі деп бағалауға бола ма?» — деген сұрақ тастады ол.

Естеріңізге сала кетейік, жақында Ресей президенті Владимир Путин Кремльде Нұрсұлтан Назарбаевпен кездескен болатын. Экс-президент отставкаға кеткеннен кейін Путинмен тұрақты түрде жүздесіп тұруды әдетке айналдырған.

Айта кетерлігі, 2025 жылдың басында Мемлекет басшысы Қасым-Жомарт Тоқаев Назарбаевтың отставкадан кейінгі іс-әрекеттерінде «саяси биязылық (деликатность)» танытпағанына назар аударған болатын. Енді депутаттар тарапынан көтеріліп жатқан бұл заңнамалық бастама Қазақстанның ішкі саясатындағы жаңа бір бетбұрыстың белгісі болуы мүмкін.