Норвегиялық екі апалы сіңлілі Тараздағы мұрасынан айырылып қала жаздады

Қайтыс болған Тараз тұрғынының Норвегияда тұрақты тұратын екі қызы мұрагерлік мерзімді өткізіп алуына және құжат рәсімдеудегі қиындықтарға байланысты мұрадан айырылып қала жаздады, деп хабарлайды Tengrinews.kz тілшісі.

Тараз сотының мәліметінше, марқұмның екі қызы мұраны қабылдау мерзімін қалпына келтіру туралы талап арызбен жүгінген. Әйелдердің айтуынша, олар Норвегияда тұрақты тұратындықтан, 2024 жылдың қазанында әкесінің қайтыс болғанын төрт айдан кейін ғана білген.

"Құжаттарды рәсімдеу кезінде талап қоюшылар бюрократиялық сипаттағы кедергілерге тап болды – нотариус мұрагерлердің тегі ағылшын тілінде көрсетілген сенімхаттарды қабылдаудан бас тартқан. Осыған байланысты нотариус оларға мұрагерлік құқығы туралы куәлік беруден де бас тартты", - деді сот өкілдері.

Істі қарау барысында сот талап қоюшылардың марқұмның үшінші қызымен бірге бірінші кезектегі мұрагерлер екенін анықтады. Басқа бірінші кезектегі мұрагерлер жоқ.

Жауапкер талап арызды толық көлемде мойындап, оның қанағаттандырылуына қарсы болмады.

Ұсынылған дәлелдемелерді бағалай келе, сот мерзімді өткізіп алу себептерін дәлелді деп таныды. Сот апалы-сіңілі Қазақстаннан тыс жерде тұрақты тұратынын, әкесінің өлімі туралы уақытылы білмегенін және құжат рәсімдеуде объективті кедергілерге тап болғанын атап өтті.

Сот шешімімен қыздарға мұраны қабылдау мерзімі қалпына келтірілді және олар әкесінің өлімінен кейін мұраны қабылдаған деп танылды.

Шешім заңды күшіне енді.

Google News арқылы жаңалықтарымызды қадағалаңыз